Հայաստանի արդարադատության նախարարության ՔԿՀ մամուլի քարտուղար Արսեն Բաբայանի տեղեկացմամբ, «Սեւան» քրեակատարողական հիմնարկում պատիժ կրող Հովհաննիսյան Ա.-ի կնոջ` Շախնազարյան Վ.-ի կողմից հուլիսի 6-ին քրեակատարողական հիմնարկ բերված հանձնուք կոնֆետները ենթարկվել են հատուկ ստուգման, որի արդյունքում կոնֆետներից մեկի մեջ, գործարանային արտադրության ջեմի փոխարեն, հայտնաբերվել է 1,2 գ ընդհանուր քաշով, սեւ գույնի, յուրահատուկ հոտով թմրանյութ:
Ըստ Շախնազարյան Վ.-ի կողմից տրված բացատրության, կոնֆետն իրեն է հանձնել անծանոթ մի քաղաքացի, որի հետ նախապես պայմանավորվածություն է ունեցել հանդիպել քրեակատարողական հիմնարկի հարակից տարածքում:
Նույն օրը, ժամը 22-ի սահմաններում, նույն քրեակատարողական հիմնարկում բաց ռեժիմով պատիժ կրող Արմեն Կոստանյանը հիմնարկ վերադառնալիս ենթարկվել է անձնական խուզարկության, որի արդյունքում վերջինիս մոտ հայտնաբերվել է 0,38 գ ընդհանուր քաշ, նույնպես սեւ գույն եւ յուրահատուկ հոտ ունեցող թմրանյութանման զանգված եւ ներարկիչ, որի մեջ հայտնաբերվել է 0,2 գ անհիդրիդի նմանվող լուծույթ:
