«Չափազանց լուրջ եմ վերաբերվում անտառի խնդրին. սա ամենեւին հերթական ակցիա չէ, այլ հետեւողական պայքարի սկիզբ: Վերջերս աշխատանքից հեռացվել են 3 օրինախախտ անտառապետներ, իսկ մեկ շաբաթ առաջ Իջեւանում իմ ուղարկած մոնիտորինգի խումբը հայտնաբերել է 59 կաղնու եւ արժեքավոր այլ ծառատեսակների ապօրինի թարմ հատում: Եվ այդ գործով այժմ դատախազությունն է զբաղվում: Ոչ ոք չի հավատա, թե առանց «անտառի» մարդու գիտության՝ հնարավոր է ծառ հատել եւ վաճառել: Միանշանակ՝ պատժվելու է ցանկացածը, ում ձեռքը կբարձրանա ապօրինի ծառ հատելու: Դա ես համարում եմ ոտնձգություն պետության դեմ: Ուզում եմ նաեւ ընդգծել, որ հանրապետության նախագահ Սերժ Սարգսյանի հանձնարարությամբ՝ խստիվ արգելված է երկրից գերան արտահանելը եւ սահմանված է խիստ հսկողություն: Անտառը մնալու է իմ ամենօրյա ուշադրության կենտրոնում»,- օրերս Լոռու մարզ կատարած աշխատանքային այցի ժամանակ ասաց ՀՀ գյուղատնտեսության նախարար Գերասիմ Ալավերդյանը: Նա կարեւորեց անտառի պահպանման եւ ապօրինի ծառահատումների դեմ պայքարի խնդիրը՝ հորդորելով անտառին վերաբերվել որպես մեր սերունդների սեփականություն:
Նշենք, որ Լոռիում գործում է 5 անտառտնտեսություն, որտեղ տարբեր ծրագրերով այս տարի 270 հա անտառվերականգնման աշխատանքներ կկատարվեն: Ցածր վարձատրության պատճառով գյուղատնտեսության որոշ օղակներում աշխատուժի պակաս կա. մարդիկ հրաժարվում են աշխատել:
Պարոն Ալավերդյանը խոսեց նաեւ անտառի փրկության եւ զարգացման ծրագրի բաղադրիչների մասին, ներառյալ անտառամերձ համայնքներում սոցիալ-տնտեսական ներդրումները, գազիֆիկացումը, առանց բնավճարի՝ թափուկների տրամադրման կարգը, ինչպես նաեւ ապօրինի ծառահատումների համար էական տուգանքներն ու պատիժները:
