![\"\"](\"https://www.aravot.am/2009/aravot_arm/July/8/p19.jpg\")
Տոկիոն փոխարինել է Մոսկվային՝ «այցելուների համար ամենաթանկ քաղաքի» վարկանիշային ցուցակի առաջին տեղում: Այդ եզրակացության է եկել Mercer Human Resource Consulting ընկերությունը: Ընդ որում՝ Մոսկվան զբաղեցրել է երրորդ տեղը՝ առաջ թողնելով եւս մի ճապոնական քաղաք՝ Օսական: Ըստ այդ վարկանիշի՝ 4-րդ տեղում է Ժնեւը, իսկ 5-րդում՝ Հոնկոնգը: Լոնդոնը, որն անցած տարի ամենաթանկ քաղաքների ցուցակում 3-րդն էր, զիջել է 13 կետ եւ այժմ 16-րդ տեղում է:
Ամենաէժան քաղաք է համարվել հարավաֆրիկյան Յոհանեսբուրգը, որը փոխարինել է Պարագվայի մայրաքաղաք Ասունսյոնին, որը վերջին վեց տարիներին Mercer-ի վարկանիշային ցուցակի ամենաստորին տողում էր:
Ռեյտինգը կազմողները հաշվի են առնում ավելի քան 200 ապրանքների եւ ծառայությունների գները, այդ թվում՝ տների, մեքենաների վարձակալությունը, սննդի եւ բենզինի գները՝ աշխարհի ավելի քան 143 քաղաքներում:
Իսկ ահա լոնդոնյան ECA International խորհրդատվական ընկերության հետազոտություններն այլ բան են ասում: Ըստ դրանց՝ աշխարհի ամենաթանկ քաղաքը այցելուների համար 2009-ին եղել է Անգոլայի մայրաքաղաք Լուանդան: Երկրորդ տեղում, այնուամենայնիվ, Տոկիոն է:
