![\"\"](\"https://www.aravot.am/2009/aravot_arm/July/8/p18.jpg\")
ՌԴ Դաշնային խորհուրդը երեկ ընդունել է հայտարարություն, որով առաջարկում է նախագահ Մեդվեդեւին դիտարկել Հարավային Կուրիլյան կղզիների եւ Ճապոնիայի միջեւ առանց վիզային ռեժիմի վերացման հարցը: Սենատորներն առաջարկում են նաեւ այլ միջոցառումներ, որոնք պետք է պատասխան լինեն Ճապոնիայի խորհրդարանի հուլիսի 3-ի որոշմանը, ըստ որի՝ Կուրիլյան չորս կղզիները հայտարարվել են Ճապոնիայի անբաժանելի տարածք: Ըստ այդ հայտարարության, Ճապոնիան անելու է ամեն հնարավորը՝ այդ կղզիները վերադարձնելու համար: ՌԴ Դաշնային խորհուրդը ճապոնական կողմի այդ քայլը բնութագրել է որպես ոչ բարեկամական եւ ռուս-ճապոնական բարիդրացիական հարաբերությունների ոգուն հակասող: Ճապոնիայի դիրքորոշումը հիմնված է 1855 թվականին ստորագրված Սիմոդյան պայմանագրի վրա, ըստ որի՝ Ռուսաստանի եւ Ճապոնիայի միջեւ սահմանն անցնում է Իտուռուպ եւ Ուռուպ կղզիների միջով: Իսկ Ռուսաստանը վկայակոչում է այն հանգամանքը, որ Կուրիլյան կղզիները իրեն են անցել 2-րդ համաշխարհային պատերազմից հետո:
Սովետական միության եւ Ճապոնիայի միջեւ խաղաղ պայմանագիր չի ստորագրվել, քանի որ Տոկիոն չի ցանկացել հրաժարվել Հարավային Կուրիլյան կղզիներից:
