ՀՀ ոստիկանության ՊՊՎ ջրամատակարարման կառույցների պահպանության գնդի հրամանատար, ոստիկանության գնդապետ Լ. Զաքարյանի դեմ բողոք են բերել ոստիկանության մի շարք աշխատակիցներ: Նրանք դիմել են ՀՀ ոստիկանապետին, կառավարությանը: Ոստիկաններն «Առավոտին» տեղեկացրել էին, որ 3-րդ ամիսն է լրանում, ինչ իրենց աշխատավարձը չեն վճարում: Նաեւ նշել էին, որ աշխատավարձը տալիս են 10 հազար դրամով պակաս՝ բացատրելով, թե՝ «Որպեսզի բոլորին բավարարի, բայց դա ակնհայտ այդպես չէ: Նույնիսկ, եթե աշխատողն աշխատավարձ վճարելու օրը հերթապահության է լինում եւ հաջորդ օրն է գնում աշխատավարձ ստանալու, հաստատ նրա համար արդեն գումար չի լինում»:
«Առավոտը» վերոհիշյալ ահազանգը հարցադրումներով 2 շաբաթ առաջ ուղարկել է նաեւ ՀՀ ոստիկանություն, սակայն մինչ օրս պատասխան չենք ստացել:
Ավելին, նախորդ օրը գնդի ոստիկանները ստացել են իրենց մեկ ամսվա աշխատավարձը՝ դարձյալ 10 000 դրամով պակաս:
