Համաշխարհային բանկը Հայաստանին կտրամադրի $60 մլն դոլար: Երեկ այս մասին համաձայնագիր են ստորագրել ֆինանսների նախարար Տիգրան Դավթյանը եւ Համաշխարհային բանկի ներկայացուցիչ Ասադ Ալամը: Վարկը կտրամադրվի մոտ օրերս՝ 20 տարի մարման ժամկետով, որից 10 տարին՝ արտոնյալ պայմաններով, 0,75% տոկոսադրույքով: Ա. Ալամի ներկայացմամբ, վարկի տրամադրման պայմանները արտոնյալ են, տոկոսադրույքն էլ բավականին ցածր է: Նրա խոսքերով. «Գումարը վերադարձնելը ծանր չի լինի Հայաստանի համար: Մեծ վստահություն ունենք, որ վարկի տրամադրման հիմքում ընկած ծախսային ծրագիրը կիրագործվի»:
Տ. Դավթյանն էլ նշեց, որ վարկի գումարներն ամբողջովին կուղղվեն այս տարվա բյուջեի սոցիալական ծախսերի ֆինանսավորմանը, մասնավորապես՝ աշխատավարձերի, կենսաթոշակների, նպաստների եւ այլ ծախսերի համար:
Նշենք նաեւ, որ $60 մլն գումարը ՀԲ-ի կողմից տրամադրվելիք $540 միլիոնի մի մասն է միայն:
