Կարծում է ԱԺ նախկին փոխխոսնակ Կարապետ Ռուբինյանը
Նախորդ օրը մամուլի ասուլիսում ՀՀԿ-ական պատգամավոր Գագիկ Մելիքյանը հայտարարել էր, որ հուլիսի 2-ին ՀԱԿ-ի հրավիրած հանրահավաքում հինգ հազար մարդ է եղել, եւ նման քանակություն կարող էր հավաքել ցանկացած գյուղապետ, իսկ ԱՄ փոխնախագահ Ալեքսան Կարապետյանն «Առավոտին» տված հարցազրույցում կարծիք էր հայտնել, որ հուլիսի 2-ի հանրահավաքն ապացույցն էր նրա, որ ՀԱԿ գլխավորած շարժումը մարում է: «Արմատ» կենտրոնի եւ ՀԱԿ անդամ Կարապետ Ռուբինյանին երեկ խնդրեցինք արձագանքել իշխանական ճամբարից հնչող նման հայտարարություններին, ինչը մեր զրուցակիցն արեց բավականին դժկամությամբ՝ «իրենց համար շատ կլինի»: Այնուհանդերձ՝ «Ըստ երեւույթին, դա վերեւից իջեցված հրահանգ է, որպեսզի սուտ թվեր հրապարակեն եւ դրանով հիասթափություն մտցնեն ժողովրդի մեջ: Այդ հրահանգը համընկել է նաեւ այդ մարդկանց անձնական ցանկություններին, ովքեր, իհարկե, երջանիկ կլինեին, եթե շարժումը մարեր եւ իրենք հանգիստ պայմաններում շարունակեին թալանել այս երկիրը: Այն, որ նման հայտարարություններն ակնհայտ սուտ են, հանրահավաքի բոլոր մասնակիցները գիտեն, ուրեմն՝ իրենք «աշխատում» են անտեղյակների վրա: Իսկ անտեղյակների խնդիրն էլ ի՞նչ է՝ մյուս հանրահավաքին մասնակցեն եւ իրենց աչքով տեսնեն իրականությունը»,- ասաց Կարապետ Ռուբինյանը: Նրա կարծիքով, սակայն, շարժումը կարող է եւ պետք է որդեգրի շատ ավելի «էֆեկտիվ» քաղաքականություն, պայքարը պետք է «գնալով ավելի արդյունավետ դառնա»: Իսկ թե ի՞նչ է ենթադրվում դրա տակ՝ «Շարժումը պարտավոր է օգտվել նմանատիպ պայքարների ամբողջ զինանոցից եւ չսահմանափակվի միայն հանրահավաքներով, ակադեմիական ելույթներով, այլ լծվի նաեւ ավելի վտանգավոր, ջանքեր խլող, բայց ավելի արդյունավետ աշխատանքի»: Մասնավորաբար՝ «Չեմ ուզում մասնավորեցնել, բայց կարծում եմ, որ շարժումը պարտավոր է նաեւ իր մեջ ստեղծել դեմոկրատական այնպիսի հարթակներ, որտեղ կլինեն այդ քննարկումները, կլինեն կարծիքների բախումներ, եւ արդյունավետ ճանապարհներ կընտրվեն: Իմ կարծիքով, ժողովրդավարության համար պայքարող ցանկացած քաղաքական ուժ կամ միավորում առաջին հերթին պարտավոր է իր մեջ ստեղծել ժողովրդավարական մեխանիզմներ՝ որոշումներ կայացնելու համար: Այս առումով ես կարծում եմ, որ ՀԱԿ-ը թերանում է. այս ուղղությամբ քայլեր պետք է ձեռնարկվեն»:
Վերջին շրջանում «Առավոտն» առիթ ունեցել է ներկայացնել ՀԱԿ այլ անդամների համանման դժգոհություններ եւս. Կարապետ Ռուբինյանից հետաքրքրվեցինք՝ արդյոք դրանք փոխանցվե՞լ են առաջին նախագահին եւ ի՞նչ արձագանք են ստացել. «Դուք էլ եք ֆիքսվում առաջին նախագահի վրա եւ կարծում եք, որ բոլոր վճիռները նա պետք է ընդունի: Ես ասում եմ, որ դա սխալ է: Եթե կա ժողովրդավարության համար պայքարող շարժում, ապա այն պետք է ներքին ժողովրդավարական մեխանիզմներ ունենա՝ որոշումներ կայացնելու համար»: Հուլիսի 2-ի հանրահավաքում ունեցած իր ելույթում առաջին նախագահը դատապարտեց այն ուժերին եւ անհատներին, ովքեր այս ողջ ընթացքում պահանջել էին, որպեսզի շարժումն ավելի վճռական քայլերի անցնի: Արդյոք այդ քննադատությունը նաեւ Ձե՞զ էր վերաբերվում՝ «Առավոտի» հարցին Կարապետ Ռուբինյանն արձագանքեց. «Շատ հնարավոր է: Բայց ես մի քիչ զարմացած եմ, որ ելույթի մոտավորապես 30 տոկոսը նվիրվեց այդ թեմային. ես չեմ կարծում, որ այդ պահին այդ խնդիրն ամենակարեւորն էր կամ նույնիսկ 30 տոկոսանոց կարեւորություն ուներ: Վերջնական ճշմարտություն, ըստ իս, գոյություն չունի, քանի որ ես էլ կարծում եմ, որ եթե ավելի վճռական քայլերի գնայինք, կարող է եւ ավելի մեծ հաջողությունների հասնեինք. այսինքն՝ այստեղ կարող է առողջ բանավեճ լինել, եւ վճիռները կայացվեն ըստ մեծամասնության կարծիքի»:
ԱԺ նախկին փոխխոսնակին խնդրեցինք գնահատել նաեւ ԵԽԽՎ հայաստանյան պատվիրակության վերջին շրջանի աշխատանքը՝ այն համատեքստում, որ պատվիրակությունը բաժանված է երկու մասի, եւ յուրաքանչյուրն իր ճշմարտությունն է փորձում ապացուցել: «Իշխանության ներկայացուցիչները սպասարկում են բռնապետության շահերը, եւ մեր աչքի առաջ այդ մարդիկ կաշվից դուրս են գալիս, որպեսզի ԵԽԽՎ պատվիրակներից թաքցնեն իրականությունը՝ ստի եւ ապատեղեկատվության միջոցով կորզեն ինչ-որ փափուկ որոշումներ, կասեցնեն որոշումների ընդունումը, որոնք վնաս կտան ոչ թե Հայաստանին, այլ իշխող հանցախմբին: Ընդդիմության ներկայացուցիչը միշտ միայնակ է եղել. ես դժվարանում եմ Ռուստամյանին ընդդիմություն անվանել, եւ դա երեւի երկար կտեւի: Հիմա, օգտվելով առիթից, ուզում եմ խորին շնորհակալություն հայտնել տիկին Փոստանջյանին՝ իր գործունեության համար՝ թե՛ ԵԽԽՎ-ի շրջանակներում, թե՛ քաղբանտարկյալների եւ քաղհալածյալների պաշտպանության: Կարծում եմ, որ բնական է այս վիճակը, քանի որ մեր երկիրն այնպիսի ներքին իրավիճակում չի գտնվում, որպեսզի դա արտաքին աշխարհում պոռթկումներ չունենա: Մեր երկրում տիրում է խայտառակ իրավիճակ՝ ամեն օր եւ ամեն վայրկյան մարդու իրավունքները ոտնահարվում են, եւ դա, բնականաբար, դրսում իր արձագանքը պետք է ստանա: Թաքցնել այդ բոլորը՝ հանուն ավազակապետության շահերի, ոչ ոք պարտավորված չէ»: Հետաքրքրվեցինք՝ մեր զրուցակիցը Ռուստամյանին՝ ի դեմս ՀՅԴ-ի՞ չի վստահում եւ ընդդիմություն չի համարում. «Ես չեմ նույնացնում Ռուստամյանին եւ ՀՅԴ-ին, չնայած նա կարկառուն անդամներից մեկն է: Ես համոզված եմ, որ Դաշնակցության շարքերում կան հարյուրավոր ազնիվ, երկրին նվիրված, հայրենասեր քաղաքացիներ: Ռուստամյանն իր խորհրդարանական գործունեությամբ ապացուցել է, որ առաջնորդվում է այլ՝ իրեն հայտնի շահերով»:
Խոսելով քաղաքական դաշտի կոնսոլիդացիայի մասին՝ իշխանական ճամբարի գործիչները տեսակետներ են հայտնում, որ եթե ՀԱԿ-ի շրջանակներում գործողները վերանայեն երկիրը պառակտման տանելու իրենց մտադրությունները՝ պահանջված կլինեն եւ գործունեության դաշտ կունենան, ինչն էլ կթուլացնի ներքաղաքական լարվածությունը. «Առավոտի» խնդրանքով արձագանքելով նաեւ այս տեսակետին՝ Կարապետ Ռուբինյանն ասաց. «Որտե՞ղ է ՀԱԿ-ը հայտարարել, որ երկիրը տանում է կործանման: Եթե իրենք նույնացնում են ավազակապետությունը եւ երկիրը՝ չարաչար սխալվում են: Եթե ինչ-որ մարդիկ պիտի կործանվեն, ապա պիտի կործանվեն այն հանցագործները, որոնք հրաման են տվել կրակել խաղաղ ցուցարարների վրա: Այն հանցագործները, որոնք մարդկանց վրա գործեր են սարքել եւ հետապնդել են նրանց քաղաքական հայացքների համար: Եթե նման անհանգստություն հայտնողները նույնացնում են նման մարդկանց ու երկիրը՝ ապա իրենք իրենց են բացահայտում: Իսկ եթե մտահոգված են ոչ թե ավազակների, այլ երկրի ճակատագրով, ցանկացած քաղաքացի՝ անկախ իր քաղաքական հայացքներից ու կուսակցական պատկանելությունից, որպես Հայաստանի քաղաքացի, պարտավոր է ոտքի կանգնել ու պայքարել: Մարդկանց պետք է գնահատենք ոչ թե նրանով՝ ՀԱԿ-ում ընդգրկվա՞ծ են կամ համագործակցո՞ւմ են, այլ՝ այս ապօրինի ռեժիմի դեմ պայքարո՞ւմ են, թե՞ ոչ»:
