«Կարծում եմ, որ դրանք անհամատեղելի կառույցներ են, որովհետեւ ՀԱԿ-ն ուզում է նրանց միավորել, բայց արդյունքում լիդեր թողնել ՀՀՇ-ին եւ Լեւոն Տեր-Պետրոսյանին:
Դաշնակցությունն ուզում է նոր ձեւավորված ֆորմատում իր առաջնորդին տեսնել: Այնպես որ, դա այդպես էլ կմնա անիրական»,- երեկ «Հայացք» ակումբում ՀԱԿ-ՀՅԴ-«Ժառանգություն» հնարավոր համագործակցության մասին ասել է Մարքսիստական կուսակցության նախագահ Դավիթ Հակոբյանը: Նա նաեւ կանխատեսել է, որ տարվա երկրորդ կիսամյակը կլինի արտահերթ ընտրության կիսամյակ. «Իլի նովովո գոսուդարյա, իլի նովիյ պառլամենտ: Իրադրությունը շատ լուրջ է, եւ, կարծում եմ, տարվա երկրորդ կեսին ականատես կլինենք այդ քաղաքական իրադարձություններին»: Ըստ մարքսիստի, եթե իշխանափոխությունը չիրականացվի բնականոն՝ ներքեւից, ապա խաբեություն է երկրի ապագայի մասին խոսելը:
«Ամենակարեւոր հանգամանքը, որ պարտադրում է ուղղակի նոր ընտրություններ, հատկապես պառլամենտական՝ 20 տարվա Հայաստանի երրորդ հանրապետության պատմությունն ամփոփելով, գալիս ենք այն եզրակացության, որ իշխանափոխությունը Հայաստանում կատարվում է ոչ թե սահմանադրական իրավունքից բխող սկզբնական իրավունքի միջոցով, այլ կատարվում է պալատական հեղաշրջումների, բլանկիզմի, տեռորիզմի, խունտիզմի եւ, ամենակարեւորը` բոնապարտիզմի ճանապարհով: Երկրին հարկավոր է սկզբունքորեն նոր ընտրական իրավունք»,- ասել է Դավիթ Հակոբյանը:
