Երեկ, «Հյուսիս-Հարավ» երկաթուղային եւ արագընթաց ավտոմոբիլային ճանապարհների նախագծերի իրականացման հայեցակարգի շնորհանդեսի ժամանակ, տրանսպորտի եւ կապի նախարար Գուրգեն Սարգսյանը նշեց, որ ներկայիս աշխարհաքաղաքական իրավիճակից ելնելով, շատ կարեւոր է Հայաստանի տարածքում հյուսիսից դեպի հարավ երկու հարեւան պետությունների միջեւ արագընթաց ավտոմոբիլային եւ երկաթուղային ճանապարհների կառուցման գաղափարը: Այս գաղափարն իրականացնելու դեպքում, ըստ նախարարի, հնարավոր կլինի ապահովել կայուն եւ արագ հաղորդակցություն Պարսից ծոցի եւ Սեւծովյան նավահանգիստների միջեւ, ինչպես նաեւ զգալիորեն կնվազեցվեն Հայաստանի արդյունաբերողների, արտահանողների եւ ներկրողների տրանսպորտային ծախսերը: Պարոն Սարգսյանի խոսքերով՝ նախագծի իրականացման գաղափարը հետաքրքրություն է առաջացրել Վրաստանում, Իրանում, Ռուսաստանում, նույնիսկ՝ Չինաստանում եւ Ղազախստանում:
Այս նախագիծը ֆինանսավորվելու է Ասիական զարգացման բանկի (ԱԶԲ) կողմից տրամադրված դրամաշնորհի միջոցով. ներկայումս կատարվում են «Հյուսիս-Հարավ» ավտոմոբիլային միջանցքի տեխնիկատնտեսական հիմնավորումները: Այս տարվա սեպտեմբերին պատրաստ կլինի վարկավորման առաջին փուլը, որով նախատեսվում է Աշտարակ-Գյումրի ավտոճանապարհի 88 կմ հատվածը դարձնել 1-ին կարգի ավտոմայրուղի, ինչը հնարավորություն կտա Հայաստանի երկու քաղաքների միջեւ ապահովել բարձրակարգ ավտոմայրուղային կապ: Գ. Սարգսյանի վստահեցմամբ՝ շինաշխատանքները կմեկնարկեն 2010 թվականին:
