Քրեական գործ՝ ոստիկանների դեմ
Երեկ ՀՀ հատուկ քննչական ծառայությունից «Առավոտին» տեղեկացրին, որ ոստիկանության աշխատակիցների կողմից պաշտոնեական լիազորությունները չարաշահելու դեպքի առթիվ հարուցվել է քրեական գործ:
2009 թ. ապրիլի 15-ին Գյումրիի «Պրեստիժ» վաճառատան մոտ, նույն քաղաքի բնակիչ Տիգրան Թադեւոսյանը ենթարկվել է ծեծի, որի հետեւանքով ստացած ծանր մարմնական վնասվածքներով տեղափոխվել է նախ՝ Գյումրու «Ճերմակ», ապա՝ Երեւանի Միքայելյանի անվան հիվանդանոց, որտեղ եւ մահացել է:
Ըստ նախաքննության մարմնի, պարզվել է, որ նշված դեպքի կապակցությամբ նյութերը ոստիկանությունում նախապատրաստվել են թերություններով, հանցագործությունը քողարկելու բացահայտ միտումով: ՀՀ ոստիկանության Գյումրի քաղաքի թիվ 1 բաժանմունքի պետ Ա. Թափալցյանը եւ հետաքննիչ Ս. Սարգսյանը ժամանակին, օրենքով սահմանված կարգով, դեպքը չեն գրանցել, անհետաձգելի քննչական գործողություններ չեն կատարել, բավարար միջոցներ չեն իրականացրել հանցագործությունը բացահայտելու համար:
Նախաքննությամբ պարզվել է, որ Տ. Թադեւոսյանին Միքայելյանի անվան հիվանդանոցում այցելել են ոստիկանության՝ Քանաքեռ-Զեյթուն բաժանմունքի աշխատակիցներ Կ. Մուրադյանը եւ Ս. Մարգարյանը, ովքեր, չարաշահելով իրենց պաշտոնեական լիազորությունները, դեպքի իրական հանգամանքների վերաբերյալ փաստաթուղթը ոչնչացրել են եւ փոխարենը կազմել կեղծ եւ իրականությանը չհամապատասխանող փաստաթուղթ: Կազմված կեղծ փաստաթուղթը կցել են նյութերին, որի հետեւանքով անձանց եւ պետությանը պատճառվել է վնաս:
Ա. Գ.
