![\"\"](\"https://www.aravot.am/2009/aravot_arm/July/2/p12.jpg\")
Արդարադատության նախարարության «Վարդաշեն» ՔԿՀ դատապարտյալները երեկ «Առավոտին» փոխանցեցին այն նամակ-դիմումը, որը ուղարկել են ՀՀ նախագահին՝ հունիսի 19-ի համաներման ակտի կապակցությամբ:Ստորեւ տպագրում ենք դատապարտյալների պահանջն ամբողջությամբ:
«Մեծարգո պարոն նախագահ: Հայտնում ենք Ձեզ մեր շնորհակալությունն ու գոհունակությունը, Ձեր կողմից կատարված մարդասիրական քայլի՝ համաներում հայտարարելու կապակցությամբ:
Արդարադատության նախարարության «Վարդաշեն» ՔԿՀ-ում ներկայումս գտնվում են դատապարտյալներ, որոնց վրա համաներումը տարածվում է, սակայն այն չի կիրառվում: Այն կապված է համաներման ակտի 8-րդ կետի՝ կատարված հանցագործությամբ պատճառված նյութական վնասը չվերականգնելու խնդրի հետ:
Նշված կետը կոպտորեն խախտում է ՀՀ սահմանադրությունն ու ՀՀ օրենքները:
Մեզանից շատերը դատավճիռներով ճանաչվել են սնանկ, ՀՀ ԴԱՀԿ ծառայությամբ ավարտվել է կատարողական վարույթները կամ դրանք կասեցվել են: Նշված կետից պարզ է դառնում, որ ՀՀ-ում կայացված դատարանների վճիռները, որոնք պարտադիր են կատարման, չեն կատարվում համաներման ակտի 8-րդ կետով, ինչպես նաեւ ոչ մի երկրում կամ համաներման ակտերում պետությունը դատապարտյալի հետ չի մտնում շուկայական հարաբերությունների մեջ: Հանցագործություն կատարած անձի դեմ դրվում է պայման, թե քեզ համաներում կշնորհվի, եթե դու վերականգնես պատճառած նյութական վնասը: Վերջիվերջո, գտնվելով ազատազրկման մեջ, ինչ պայմաններով եւ կամ ինչպես պետք է դատապարտյալը վերականգնի պատճառված վնասը:
ՀՀ օրենսդրությունը թույլ է տալիս քրեական վարույթից տարանջատել քաղաքացիաիրավական վարույթը, ուղարկել վարչական դատարան, վարչական դատարանն էլ լուծի քաղհայցի հարցը եւ մեր հանդեպ կիրառվի համաներում:
Համաներման ակտն ինքն իրենով մարդասիրական քայլ է հանցագործություն կատարած անձին ներելու եւ հասարակությանն ինտեգրելուն ուղղված, այլ ոչ թե պայմանագիր դատապարտյալի եւ պետության միջեւ:
Դիմելով Ձեզ, խնդրում ենք Ձեր միջամտությունը նշված հարցը ՀՀ սահմանադրությամբ եւ ՀՀ օրենքներով լուծելու:
Նախապես հայտնում ենք մեր շնորհակալությունը, ակնկալելով, Ձեր մեծահոգությունը:
Հայցում ենք Ձեր ներողամտությունը:
Հովհաննես Բաղդասարյան, Վահե Բեկնազարյան, Վաղարշակ Քյարունց, Հովհաննես Տեր-Հարությունյան, Սարգիս Բաբայան, Հովհաննես Ֆիդանյան
«Վարդաշեն» ՔԿՀ դատապարտյալներ»:
