![\"\"](\"https://www.aravot.am/2009/aravot_arm/June/30/p23.jpg\")
Ասում են Տավուշի մարզի Սարիգյուղը երկարակյացների համայնք է: Գյուղապետի վկայությամբ, այսօր գյուղում 90-ը բոլորած 8 տատիկ է ապրում, բայց կան նաեւ ավելի տարեցներ՝ Նախշուն տատը, որ բոլորել է 100 տարին: Տատի 100-ամյակը նշելու համար տարբեր բնակավայրերից Սարիգյուղի հայրական տանն էր հավաքվել Նախշունի ամբողջ գերդաստանը` երեխաները, թոռները, թոռան թոռները` մոտ 100 հոգի: 100-ամյակը՝ 100 հոգով: 1909 թվականին ծնված Նախշունը Իջեւանի շրջանի Աչաջուր գյուղից հարս է եկել Սարիգյուղ՝ Կոստանյանների ընտանիք, ունեցել 6 երեխա` երեք աղջիկ, երեք տղա: Կրտսեր որդին ընդամենը երկու օրական էր, երբ երկրորդ աշխարհամարտը սկսվեց ու Նախշունի ամուսինն էլ զորակոչվեց բանակ` մեծ գերդաստանի հոգսը թողնելով երիտասարդ կնոջ ուսերին: Հիմա 100-ամյա կինն ու նրա զավակները, որոնցից երկուսի կորստի ցավն էլ է արդեն Մեծ տատի սրտում, հեքիաթի պես ու նույնիսկ երբեմն զարմանալի հանգստությամբ են հիշում անցած-գնացած ծանր օրերը: Նախշուն տատի հոգսը փոքր-ինչ թեթեւացել է, երբ զավակները հասունացել են, աշխատել: Հիմա արդեն նրանք են թոռնատեր ու ծոռնատեր մարդիկ ու իրենց մորը երեխայի պես խնամում են: Ու հավաքվել էին հիշելու Նախշուն տատի օրերը, ապրած շիտակ կյանքը:
Թուխիկ տատ: Մանկուց այդպես են նրան կոչել՝ թուխ մաշկ ունենալու պատճառով: Նախշուն-Թուխիկ տատը շատ լավ հիշողություն ունի, պայծառ միտք ու թոռներին պատմում է նրանց մանկական արկածները: Նույնիսկ սեղանի շուրջ երգեց, ի նշան երախտագիտության՝ հյուրերի: Նախշուն տատի մեկդարյա հոբելյանը շնորհավորել են նաեւ մարզային տարբեր կառույցների ներկայացուցիչները, իսկ նվերներ ստացել է մարզպետ Արմեն Ղուլարյանից, գյուղապետ Կոմիտաս Էլլարյանից, ոստիկանության ներկայացուցիչներից:
Մեկ դար ապրած Նախշուն տատին մաղթում ենք երկարակեցություն, առողջություն եւ արեւշատություն:
