Թե ինչ պատահեց, երբ ՀՀ շարքային քաղաքացիները կարգի հրավիրեցին անվտանգության աշխատակցին
Կարեն Դեմիրճյանի անվան մարզահամերգային համալիրի ներքին անվտանգության աշխատակից Վահան Ալոյանի դեմ մայիսի 11-ին հարուցվել էր քրեական գործ, որի դատաքննությունն այս օրերին ընթանում է Կենտրոն եւ Նորք-Մարաշ համայնքների ընդհանուր իրավասության դատարանում:
Ալոյանը մարտի 7-ին ոգելից խմիչք օգտագործած վիճակում Մարգարյանի ծննդատան մոտ (Մաշտոցի 22) «անհասցե սեռական բնույթի հայհոյանքներ» է տվել: Տեսնելով, որ հայհոյանքներին վերջ չի տալիս, նրան համարձակվել է դիտողություն անել արեւածաղկի սերմ վաճառող Հայկ Պետրոսյանը: Անվտանգության աշխատակցին վերջինիս դիտողությունը դուր չի եկել (գործի նյութերով՝ «արհամարհել է նրան»- Ռ. Մ.), եւ նա սկսել է քաշքշել ու հարվածել ժողովրդի ներկայացուցչին: Բարեբախտաբար, հավաքվել է 20-22 մարդ, իսկ անվտանգության աշխատակցի խուլիգանությունը կանխվել է այդ պահին վրա հասած ՊՊԾ գնդի 1-ին գումարտակի 1-ին վաշտի աշխատակիցներ Սուրեն Ղազարյանի եւ Ֆյոդր Մուրադյանի կողմից, որոնք Ալոյանին բերման են ենթարկել ոստիկանության Կենտրոնականի բաժին: Ալոյանը սթափվելով՝ զղջացել է: Ի դեպ, ըստ շտապօգնության 033723 ակտի, անվտանգության աշխատակցի խմածությունը 3-րդ աստիճանի էր:
Դատաքննությունը կշարունակվի հուլիսի 3-ին:
