ՀՀ ոստիկանության ՊՊՎ ջրամատակարարման կառույցների պահպանության գնդի հրամանատար, ոստիկանության գնդապետ Լ. Զաքարյանի դեմ բողոք են բերել ոստիկանության մի շարք աշխատակիցներ:
Մինչ «Առավոտին» դիմելը, նրանք դիմել են ՀՀ կառավարությանը, սակայն հարցը որեւէ լուծում չի ստացել: ԶԼՄ օրենքի համաձայն, աղբյուրի խնդրանքով չբացահայտելով ոստիկանների ինքնությունը, հրապարակում ենք բողոքն ամբողջությամբ:
«Արդեն 3-րդ ամիսն է լրանում՝ ինչ մեր աշխատավարձերը չեն վճարում, նույնիսկ ում ուզում, նրան են տալիս:
Պահակետում 4-ի փոխարեն 3 հոգի է ծառայում, ինչը նշանակում է, որ ծառայողը օրենքով յուրաքանչյուր 4-րդ օրը աշխատանքի գնալու փոխարեն գնում է 3-րդ օրը, այսինքն՝ 1 ամսվա կտրվածքով 8 աշխատանքային օրվա փոխարեն աշխատում են 12 օր եւ դրա դիմաց չեն վարձատրվում:
Համազգեստ չեն տալիս, բայց փոխարենը պահանջում են՝ գնացեք գնեք, դա նույնպես օրենքի խախտում է:
Աշխատավարձը տալիս են 10 հազար դրամով պակաս՝ բացատրելով, թե՝ որպեսզի բոլորին բավարարի, բայց դա ակնհայտ այդպես չէ: Նույնիսկ, եթե աշխատողն աշխատավարձ վճարելու օրը հերթապահության է լինում եւ հաջորդ օրն է գնում աշխատավարձ ստանալու, հաստատ իր համար արդեն գումար չի լինում:
Ամանորի հասանելիք պարգեւավճարներ չեն տրվում:
Բազմակի անգամ աշխատողներս բողոք ենք ներկայացրել. ընդունել են, համոզել, թե ամեն ինչ կշտկվի, սակայն սայլը տեղից չի շարժվել:
Պարոն գնդապետին բողոքելու դեպքում էլ պատասխանը լինում է. ում ձեռք չի տալիս՝ թող դիմում գրի, այլապես ինքս կհեռացնեմ:
Մի խոսքով, գունդը դարձրել է սեփական հիմնարկություն:
Մենք չենք կարծում, որ ՀՀ-ում ոստիկանության որեւէ գնդում այսպիսի իրավիճակ գոյություն ունի, ինչպիսին ՊՊՎ ջրամատակարարման կառույցների պահպանության գնդում է»:
«Առավոտը» վերոհիշյալ ահազանգը հարցադրումներով ուղարկել է նաեւ ՀՀ ոստիկանություն, ակնկալելով, որ ՀՀ ոստիկանության ԿՀԴՊ թրաֆիքինգի վարչությունն իրական բացահայտումներ կսկսի հենց իրենց համակարգից, նաեւ մեզ տեղեկացնելով աշխատանքային շահագործման կապակցությամբ ձեռնարկած միջոցառումների մասին:
