ՀՀ ԿԸՀ-ում «Ժառանգություն» կուսակցության ներկայացուցիչ Զոյա Թադեւոսյանը երեկ «Ա1+»-ին տված հարցազրույցում ասել է, թե իրեն բոլորովին չի զարմացնում այն փաստը, որ ԵԽԽՎ լիագումար նիստում լուրջ քննարկման առարկա չդարձան Երեւանի ավագանու ընտրությունները, դրա ընթացքում տեղի ունեցած համատարած խախտումները: «Ես եվրոպացիներին, ընդհանրապես Արեւմուտքին լուրջ չեմ վերաբերվում: Արեւմուտքն այնքան է հղփացել, որ ժողովրդավարական արժեքները նրանց համար դարձել են երկրորդական: Նրանց համար «fast food»-ից կամ էժանագին ուտելիքներից բացի, այլ արժեքներ չկան»: Անդրադառնալով ԵԽ դիտորդների կողմից երեւանյան ընտրությունները որպես եվրոպական չափանիշներին համապատասխան տրված գնահատականին, տիկին Թադեւոսյանը հայտարարել է, որ դա «նշանակում է, որ եվրոպացիներն էլ են գտնվում նույն աղբի մեջ»: Նա անիմաստ է համարել ԵԽԽՎ Մոնիտորինգի հանձնաժողովում բարձրացված այն հարցը, թե «Ընտրական օրենսգրքում» էլի պետք է փոփոխություններ արվեն. «Իսկ ո՞վ է ասում, որ մեր երկրում ԸՕ-ն գործում է: Ընտրության օրը բոլորը մի կողմ են շպրտում ԸՕ-ն եւ անում են այն, ինչ նրանց ասված է: Եթե մենք չենք ուզում ընտրություն կատարել, բերե՛ք ամենալավ օրենսգիրքը՝ ոչինչ չի ստացվի»:
