Գերմանական մամուլը նշում է, որ IBF-ի չեմպիոն Արթուր Աբրահամի եւ ծագումով թուրք Մահիր Օրալի միջեւ հունիսի 27-ին նշանակված մենամարտը հայ բռնցքամարտիկի համար կարող է վերջինը լինել միջին քաշային կարգում: Աբրահամը վաղուցվանից քաշ գցելու հետ կապված խնդիրներ է ունենում, դրա պատճառով էլ պլանավորում է շուտով տեղափոխվել երկրորդ միջին քաշային կարգ:
Համընդհանուր համոզմամբ, Արթուրի եւ WBC/WBO վարկածներով չեմպիոնական տիտղոսների տիրակալ, ամերիկացի Կելլի Պավլիկի միջեւ գոտիների միավորման մենամարտն ամենասպասվածն է միջին քաշային կարգում: Սակայն Պավլիկը եւ նրա պրոումոթերները, հայ բռնցքամարտիկի խոսքերով, խուսափում են իր հետ հանդիպելուց: «Ես հայտարարում եմ, որ Պավլիկը խուսանավում է ինձ հետ մենամարտից,-Աբրահամի խոսքերը մեջբերում է «Boxing Scene.com»-ը:- Նա մեկ վնասվածք է ստանում, մեկ հրաժարվում: Նրանք միշտ էլ մի պատճառաբանություն գտնում են: Ես նրանց չեմ հասկանում: Ես պատրաստ եմ Պավլիկի հետ մենամարտել»:
Աբրահամը վստահ է, որ ավելի բարձր քաշային կարգում ավելի ուժեղ կլինի: «Իմ մարզիչ Ուլի Վեգներն ասում է, թե առայժմ ես մենամարտում եմ իմ իրական հնարավորությունների 60%-ի չափով: Իսկ եթե նա է այդպես ասում, ուրեմն դա այդպես է եւ նրան հավատում եմ: Մեկ քաշային կարգ բարձրանալով՝ մենք կլրացնենք պակասող 40%-ը, եւ ես ավելի հզոր կդառնամ»,- եզրափակել է Արթուր Աբրահամը:
