Էջմիածին քաղաքի Մաշտոցի փողոցում իրականացվող շինարարության պատճառով 2 ծառ է արմատախիլ արվել: Այս մասին օրերս «Առավոտին» հայտնեցին այս տարածքի հարեւանությամբ ապրող էջմիածինցիները: Նրանց խոսքերով, շինարարությունն իրականացնողը երկար ժամանակ ձեռք չի տվել ծառերին, սակայն հենց դրանք սկսել են կառույցին խանգարել, անմիջապես գործի է անցել ու, ավելորդ քաշքշուկի մեջ չընկնելու համար, ծառերը հենց արմատից հանել է, իրենց՝ բնակիչների առջեւ էլ արդարանալով, թե քամուց են ընկել:
Այս առնչությամբ Էջմիածնի քաղաքապետարանի հասարակության հետ կապերի վարչությունից մեզ պարզաբանեցին, որ մեկ շաբաթ առաջ իրենց մոտ տեղի ունեցած ուժգին քամու պատճառով է այդ տարածքի միակ ծառն ընկել, որը չէր խանգարում շինարարությանը, շինարարությունն էլ օրինական է եւ ոչ մի խախտում թույլ տրված չէ: Նրանք տեղեկացրին նաեւ, որ այդ քամու հետեւանքով քաղաքին 14 միլիոն դրամի վնաս է հասցվել:
