Հայաստանի եւ Արցախի միջեւ մարզական ոլորտում 2009/2012 թթ. համագործակցության համաձայնագրի ստորագրումից հետո կազմակերպված մամուլի ասուլիսում ԼՂՀ կառավարությանն առընթեր սպորտի պետական կոմիտեի նախագահ Ռազմիկ Հովսեփյանը խոսեց նաեւ Լեռնային Ղարաբաղում ֆուտբոլը զարգացնելու նպատակով խաղադաշտեր կառուցելու համար ՀՖՖ-ի կատարած 40 միլիոն դրամ ներդրման մասին:
Ակամա հիշեցինք շվեյցարացի գործարար, «Արարատ» ֆուտբոլային ակումբի սեփականատեր Հրաչ Կապրիելյանի՝ տարիներ շարունակ Արցախում ֆուտբոլի պահպանման ու զարգացման հոգսերն իր ուսերին կրելու մասին հավաստիացումները եւ ՀՖՖ նախագահ Ռուբեն Հայրապետյանի հակառակ պնդումները:
Առիթն օգտագործելով՝ փորձեցինք հարցի շուրջ հնարավոր առավել ճշգրիտ տեղեկատվություն ստանալ Հայրապետյան-Կապրիելյան հակամարտության կողմ չհանդիսացող ու, թերեւս, ամենաշահագրգիռ պաշտոնյայից՝ հենց ԼՂՀ սպորտի ղեկավարից: Եվ ահա, թե նա ինչ ասաց: «Ժամանակին պայմանագրով Ստեփանակերտի քաղաքային ստադիոնը 25 տարով տրվել է շվեյցարացիներին եւ ֆուտբոլն ամբողջությամբ նրանց ձեռքում էր: Սակայն վերջին շրջանում նրանք թիմն էլ չէին կարողանում պահել: Վերջերս այդ հարցը միասին քննարկեցինք ԼՂՀ նախագահ Բակո Սահակյանի հետ: Պայմանավորվեցինք ֆուտբոլը փոխադրել պետական կառույցի միջոցների վրա, իսկ ստադիոնի պահպանման ծախսերը թողնել նրանց»:
Եվ ի՞նչ, հիմա ստադիոնում կատարվող աշխատանքներում դրական տեղաշարժ կա՞: «Ճիշտն ասած՝ ոչ»,- եղավ Ռազմիկ Հովսեփյանի կարճ պատասխանը:
