2013-ի հունվարի 1-ից Հայաստանում խաղատներ են լինելու միայն Ծաղկաձորում, Սեւանում եւ Ջերմուկում: Իսկ մայրաքաղաքում խաղատան բացման մասին հարցը կարող է քննարկվել միայն $100 մլն ծավալի բիզնես-առաջարկի դեպքում՝ համատեղված առնվազն 125 սենյակից բաղկացած բարձրակարգ հյուրանոցի շինարարությամբ: Երեկ կառավարության նիստում որոշվել է այս եւ մի քանի այլ փոփոխություններ կատարել «Շահումով խաղերի եւ խաղատների մասին» օրենքում:
«Սա է մեր սկզբունքային դիրքորոշումը, հանրապետության նախագահի դիրքորոշումը՝ 2013-ից խաղատներ չպետք է լինեն երկրի կենտրոնական մասում եւ Երեւանի շրջակայքում»,- ասել է վարչապետ Տիգրան Սարգսյանը:
Նիստում որոշվել է նաեւ հակաճգնաժամային ծրագրի միջոցառումների շրջանակում Արագածոտնի, Արարատի, Արմավիրի եւ Կոտայքի մարզերի գերնորմատիվային ջրապահանջարկ ունեցող բնակավայրերի ջրօգտագործողներին պետական աջակցություն ցուցաբերելու նպատակով կառավարության պահուստային ֆոնդի հաշվին գյուղատնտեսության նախարարությանը հատկացնել 1 մլն 876 հազար դրամ: Նշված մարզերի 70 համայնքների ջրօգտագործողներին, օգտագործած փաստացի ոռոգման ջրի դիմաց՝ բացառությամբ գերնորմատիվային ծախսի վճարումից, անհատույց դրամական հատկացում է արվում: Աջակցությունը կտրվի մինչեւ 1 հա հողատարածքները սեփականության, վարձակալության կամ անհատույց օգտագործման իրավունքով տնօրինող գյուղատնտեսական հողօգտագործողներին: Վարչապետը նշել է, որ կառավարությունն 1-ին անգամ է ֆինանսավորում գյուղացիական տնտեսություններին, եւ այս ձեռնարկն ունի հակաճգնաժամային բնույթ եւ բովանդակություն:
