![\"\"](\"https://www.aravot.am/2009/aravot_arm/June/11/p5.jpg\")
Այն նահանգապետերը, որոնք չեն կարողանա ինքնուրույն պայքարել գործազրկության եւ աշխատավարձերի ուշացման դեմ, ազատվելու են աշխատանքից: Այդ մասին երեկվա խորհրդակցության ժամանակ հայտարարել է ՌԴ նախագահ Մեդվեդեւը: «Անընդունելի է, երբ խնդիրների լուծումը պահանջում են Մոսկվայից եկած ղեկավարներից»,- նշել է Ռուսաստանի ղեկավարը: Բացի այդ, Մեդվեդեւը հանձնարարել է Հարավային շրջանի լիազոր-ներկայացուցչին՝ ստուգել տեղեկատվությունն այն մասին, որ օլիմպիական օբյեկտների շինարարության համար մրցույթների ժամանակ ոտնահարվում են ռուսաստանյան ընկերությունների շահերը: Հունիսի 9-ին ՌԴ վարչապետ Վլադիմիր Պուտինը հայտարարել է, որ գործազրկության գագաթնակետն անցած է, եւ գործազուրկների թիվը սկսել է աստիճանաբար նվազել: Պուտինի տվյալներով, մայիսի վերջին ՌԴ-ում կար 7,7 միլիոն գործազուրկ: Ավելի վաղ ՌԴ վարչապետը մեկնել էր Լինինգրադի մարզ, որտեղ աշխատավարձ չստացած բանվորները փակել էին մայրուղին: Ստեղծված իրավիճակի համար Պուտինը մեղադրեց ոչ միայն ձեռնարկությունների ղեկավարներին, այլեւ մարզի ղեկավարներին:
