Վարչապետը հրաժարակա՞ն կտա

Կառավարության կողմից ԱԺ ներկայացված հարկային փաթեթի մասին երեկ լրագրողների հետ հանդիպման ժամանակ՝ իրենց տեսակետները հայտնեցին ԲՀԿ կուսակցության անդամ, ԱԺ պատգամավոր Վարդան Բոստանջյանը եւ «Պոլիտէկոնոմիա» հետազոտական ինստիտուտի տնօրեն, տնտեսագետ Անդրանիկ Թեւանյանը: Վ. Բոստանջյանի կարծիքով, այդ օրինագիծը չի համապատասխանում առողջ դատողությանը: Նրա խոսքերով, չի բացառվում, որ այդ օրինագծի քվեարկությանը ԲՀԿ-ն չմասնակցի: Վ. Բոստանջյանը հավելեց, որ չնայած ՀՀԿ-ի կողմից առաջարկած որոշակի փոփոխություններին, իրենց դիրքորոշումը մնում է անփոփոխ. «Այդ փոփոխությունները երբեւէ չեն կարող ապակողմնորոշել մեզ նման մտածողներին: Այդ օրինագիծը հակասում է ՀՀ սահմանադրության 5-րդ եւ 6-րդ հոդվածներին»: Ա. Թեւանյանն էլ վստահեցրեց, որ ինքը դեռեւս երկու տարի առաջ էր կանխորոշել Հայաստանում միակենտրոն տնտեսական համակարգ ձեւավորվելու մասին. «Իմ կարծիքով, մեծ բյուջեի քաղաքականություն հայտարարելով՝ իշխանությունը նպատակ է հետապնդում իր ձեռքում հավաքել ամբողջ տնտեսությունը, ինչը կիրականացնի ստվերային տնտեսության պայքարի դրոշի ներքո, մինչդեռ իրականում իշխանությունները իրականացնում են սեփականության վերաբաշխում»: Նրա համոզմամբ, այդ քաղաքականության զոհերը առաջին հերթին դարձան փոքր եւ միջին բիզնեսի ներկայացուցիչները. «Այս տարվա պետական վիճակագրական ծառայության տվյալներով, տնտեսության բոլոր ոլորտներում նկատվում է անկում, բացառություն է կազմում միայն մանրածախ առեւտրաշրջանառության ոլորտը»: Տնտեսագետի ներկայացմամբ, կառավարության վարած քաղաքականությունը հուշում է, որ իշխանությունների գործունեությունը ոչ թե ստվերային տնտեսության դեմ է, այլ՝ ստվերի վերաբաշխման: Ըստ Ա. Թեւանյանի, «իշխանությունները փորձում են իրենց հայեցողությամբ տնօրինել բյուջեն: Նրանք բիզնեսի որեւէ շերտի ընկալման տրամաբանություն չունեն»:

Վ. Բոստանջյանը համաձայնեց նախօրեին ՀՅԴ պատգամավոր Վահան Հովհաննիսյանի այն կարծիքին, թե «օրինագծի փոփոխությունները կառավարության հարկային քաղաքականության ձախողված լինելու վկայությունն են»: Իսկ հարցին, թե արդյո՞ք այդ ձախողումը չի ենթադրում, որ վարչապետը հրաժարական կտա, պատգամավորը պատասխանեց. «Ուզում եք հենց դա՞ ասեմ: Մտածեք, որ ասացի»:

Նույն հարցի առնչությամբ էլ Ա. Թեւանյանը նշեց. «Վարչապետի աշխատանքի դադարեցում ոչ մի դեպքում չի լինի, քանի որ այդ կվկայի նախագահի թույլ լինելու մասին»: