![\"\"](\"https://www.aravot.am/2009/aravot_arm/June/9/p12.jpg\")
ԱՄՆ պետքարտուղար Հիլարի Քլինթոնը չի բացառել, որ վերջին միջուկային փորձարկումներից հետո Կորեայի Ժողովրդա-դեմոկրատական Հանրապետությունը կրկին կհայտնվի «սեւ ցուցակում», որի մեջ, ըստ ԱՄՆ-ի, մտնում են միջազգային ահաբեկչությանն աջակցող երկրները: Քլինթոնի խոսքերով՝ Պետդեպարտամենտի փորձագետները սկսել են փնտրել ապացույցներ, որոնք կհաստատեն, թե Հյուսիսային Կորեան շարունակում է սատարել միջազգային ահաբեկչական կազմակերպություններին: Մայիսի վերջին Փհենյանի կողմից իրականացված միջուկային փորձարկումներից եւ հրթիռների բացթողումներից հետո մի խումբ սենատորներ դիմել են ԱՄՆ նախագահ Բարաք Օբամային՝ խնդրելով վերադարձնել Հյուսիսային Կորեան «սեւ ցուցակ» եւ կարծրացնել նրա դեմ կիրառվող պատժամիջոցները: Այդ փորձարկումները անհանգստություն առաջացրին նաեւ ՄԱԿ-ի Անվտանգության խորհրդում, որը միաձայն դատապարտել է Փհենյանի գործողությունները: Հյուսիսային Կորեան հանվել էր «սեւ ցուցակից» 2008-ի հոկտեմբերին՝ Ջորջ Բուշի նախագահության օրոք: Այն ժամանակ Փհենյանը խոստացել էր թույլ տալ միջազգային տեսուչների մուտքը իր միջուկային օբյեկտներ:
