ՀՀ կառավարությունը հավանություն է տվել համայնքների խոշորացման եւ միջհամայնքային միավորումների ձեւավորման հայեցակարգին, իսկ հայեցակարգը քննարկելու համար ձեւավորվել է հանձնաժողով՝ որի առաջին նիստը հունիսի 6-ին էր: Հանձնաժողովի նախագահն է ՀՀ տարածքային կառավարման նախարար, փոխվարչապետ Արմեն Գեւորգյանը, հանձնաժողովում ներկայացված են ինչպես տարբեր նախարարությունների ներկայացուցիչներ, մարզպետներ, այնպես էլ հ/կ-ների ու ԶԼՄ-ների ներկայացուցիչներ:
Համայնքների խորոշացումը այսօր արդիական թեմա է հատկապես Եվրոպայում, ուր վերջին 10-15 տարում այս ոլորտում հսկայական աշխատանք է կատարվել: Իսկ Հայաստանում սրա մասին խոսվում է արդեն 4-5 տարի: Հանձնաժողովի առաջին նիստի ընթացքում որոշվեց ձեւավորել աշխատանքային խմբեր եւ աշխատել թափանցիկ: Չի բացառվում, որ հանձնաժողովը համագործակցի Հանրային խորհրդի տեղական ինքնակառավարման հարցերի հանձնաժողովի հետ:
