Երեկ «Առավոտի» խմբագրությունը ահազանգ ստացավ այն մասին, որ Էրեբունի թանգարանի հարեւանությամբ գտնվող թիվ 80 մանկապարտեզը հիմնահատակ քանդում են, ձեռքի հետ էլ մանկապարտեզի բակի հաստաբուն ծառերն են հատում:
Այս առնչությամբ Էրեբունու թաղապետարանից «Առավոտին» վստահեցրին, որ մանկապարտեզի շենքը 4-րդ կարգի վթարային էր, եւ մի քանի ամիս առաջ եզրակացություն եւ որոշում է եղել այն ապամոնտաժելու մասին, իսկ երեխաները ժամանակավորապես կհաճախեն նույն համայնքի թիվ 91 մանկապարտեզը: Մեր հարցին, թե մանկապարտեզի տեղը ի՞նչ է կառուցվելու, թաղապետարանի աշխատակիցն ասաց, որ դեռեւս հայտնի չէ, հատկապես, որ այսուհետեւ թաղապետարանները նախկին գործառույթը չեն կատարելու: Ինչ վերաբերում է այն փաստին, որ նաեւ ծառեր են հատում, թաղապետարանի աշխատակիցն ասաց. «Նախագծից դուրս ոչինչ չի արվում: Այդտեղ ծառեր չեն հատվում»:
