Կառավարության երեկվա նիստում որոշում է կայացվել գյուղատնտեսական վարկերի տոկոսադրույքների սուբսիդավորման փորձնական ծրագրի պայմանները երկարացնելու եւ փոփոխելու մասին: Նշենք, որ համաձայն այդ ծրագրի, Հայաստանի 60 ամենաաղքատ գյուղական համայնքների բնակիչների կողմից գյուղատնտեսական աշխատանքների համար վերցրած վարկի տոկոսադրույքի մի մասը՝ 10%-ը, սուբսիդավորվում էր պետության կողմից: Ինչպես նիստում տեղեկացրել է ֆինանսների նախարար Տիգրան Դավթյանը, նոր որոշմամբ՝ «գյուղական համայնքների նոր վարկառուները կարող են համարձակորեն վարկեր վերցնել՝ արդեն զրոյական տոկոսադրույքով»: Նախարարը տեղեկացրել է նաեւ, որ սուբսիդավորման ծրագիրը կերկարացվի մինչեւ բյուջետային տարվա ավարտը: Այս մասին տեղեկացնում է կառավարության տեղեկատվության եւ հասարակայնության կապերի հետ վարչությունը:
Հակաճգնաժամային միջոցառումների շրջանակում երեկ որոշվել է նաեւ $2.5 միլիոնի պետական երաշխիքներ տրամադրել «Էլիտ Գրուպ» շինարարական ընկերությանը՝ մայրաքաղաքում շինարարական նախագծերն ավարտելու նպատակով: Վարկը տրամադրվել է 3 տարի մարման ժամկետով: Վարչապետ Տիգրան Սարգսյանը նշել է, որ սա առաջին հայտն է, որը բավարարել է կառավարությունը՝ շինարարությունը խթանելու նպատակով, եւ պատրաստ է քննարկել այլ առաջարկներ եւս։
Սեւանա լճից մեխանիկական ոռոգման համակարգերից սնվող հողատարածքների ոռոգումն ապահովելու նպատակով, կառավարությունը երեկ որոշել է Սեւանա լճից 2009-ի ոռոգման շրջանում ջրառի չափաքանակը սահմանել մինչեւ 142 մլն խմ:
