«Միասնական Ջավախք» ժողովրդական շարժման առաջնորդ Վահագն Չախալյանի հարցը ողջ Ջավախքի հայության խնդիրն է: Այդ մասին PanArmenian.net-ում հայտարարել է Փարիզի փաստաբանների կոլեգիայի անդամ, ֆրանսիացի դատապաշտպան Պատրիկ Արափյանը: «Այս խնդիրը շատ խորն արմատներ ունի: Դեռեւս Զվիադ Գամսախուրդիայի օրոք Վրաստանում գոյություն ուներ մի կարգախոս՝ «Վրաստանը վրացիների համար»: Հենց այս քաղաքականության արդյունքում էլ Ջավախքում ապրող կես միլիոն հայերից այժմ մնացել են միայն 280 000-ը»,- նշել է ֆրանսիացի դատապաշտպանը:
Մայիսի 29-ին Թբիլիսիի քաղաքային դատարանում տեղի է ունեցել երկրորդ դատական նիստը, որում որպես Չախալյանի պաշպան հանդես է եկել արդեն Պատրիկ Արափյանը: Պատասխանող կողմ Վրաստանի արդարադատության նախարարությունը գործի քննության հետ կապված փաստաթղթեր է ներկայացրել դատարան, իսկ դատարանն էլ դրանք զննելու պատճառով դատական նիստը հետաձգել է մինչեւ հունիսի 15-ը:
Փետրվարի 16-ից Վրաստանի արդարադատության նախարարությունը, առանց որեւէ պատճառի, Արափյանին չի ցանկացել գրանցել որպես Չախալյանների ընտանիքի պաշտպան: Վրաստանի օմբուդսմեն Սոզար Սուբարին նամակ էր հղել արդարադատության նախարար Ադեիշվիլուն, առաջարկել էր վերականգնել Չախալյանի ոտնահարված իրավունքը եւ թույլ տալ օգտվել ֆրանսիացի դատապաշտպանի ծառայություններից, սակայն վրացական իշխանություններն արհամարհեցին այս խորհուրդը:
Ապրիլի 14-ին եւ 28-ին, ի պաշտպանություն Վահագն Չախալյանի, Փարիզում տեղի ունեցած երթի ժամանակ Ֆրանսիայիում Վրաստանի դեսպանը խոստացել է, որ Վրաստանի իշխանությունները դրական որոշում կկայացնեն Պատրիկ Արափյանի գրանցման հարցում:
Այս տարվա ապրիլի 16-ին Վահագն Չախալյանը դատապարտվել է 10 տարվա ազատազրկման եւ 10 650 դոլարի դրամական տույժի: Չախալյանների ընտանիքը պատրաստվում է այս գործը բողոքարկել վերին ատյանների դատարաններում, հետագայում նաեւ Եվրոդատարանում:
