![\"\"](\"https://www.aravot.am/2009/aravot_arm/June/4/p5.jpg\")
Երեկ Հայ ազգային կոնգրեսը անդրադարձել է Երեւանի ավագանու մայիսի 31-ին տեղի ունեցած ընտրություններին ու արձանագրել, որ դրանց ընթացքում, նախընտրական ժամանակաշրջանում «Հայաստանում կատարվել է աննախադեպ ընտրական զեղծարարություն», որին մասնակցել են ոչ միայն իշխող կոալիցիայի կուսակցությունները՝ ավանդական դարձած մեթոդներով, «այլեւ ամբողջատիրական (տոտալիտար) մեթոդներով դրան է ծառայեցվել ողջ պետական համակարգը՝ Սերժ Սարգսյանի գլխավորությամբ եւ համակարգմամբ»: ՀԱԿ-ի դիտարկմամբ, անցած ընտրությունների ընթացքում կիրառված ընտրակեղծիքների տեխնոլոգիաները ապացուցում են, որ Հայաստանում «ստեղծվել է դեմոկրատական ֆասադով քրեապետական ամբողջատիրական պետական համակարգ: Երկրի վարչախումբը, ըստ էության, վերածվել է խունտայի, որը պետական իշխանության լծակների եւ քրեական աշխարհի միաձուլմամբ ստեղծել է համատարած ահաբեկման մի ապարատ, որն այսօր կարողանում է ազդել ցանկացած ընտանիքի վրա»: Կոնգրեսը միաժամանակ «երկրի բոլոր դեմոկրատական քաղաքական ուժերին» կոչ է արել համախմբվել «ժողովրդավարության հաստատման համար մղվող պայքարում»: Իսկ ՀԱԿ համակարգող Լեւոն Զուրաբյանը երեկ չի բացառել, որ Կոնգրեսը կարող է առաջիկայում հասարակությանը քաղաքացիական անհնազանդության կոչով դիմել՝ ասելով, որ «միշտ քննարկվել է համատարած քաղաքացիական շարժում ձեւավորելու հնարավորությունը»՝ առավել եւս, որ իշխանությունը հստակ հասկացրել է ժողովրդին, որ ռեժիմի հետ քվեաթերթիկով չպետք է խոսել:
