«Շտուտգարտ» ֆուտբոլային ակումբին պատկանող «Mersedes-Benz-Arena» ստադիոնի հիմնանորոգման ժամանակ շինարարները խաղադաշտի տակ հայտնաբերել են Երկրորդ համաշխարհային պատերազմի տարիներից մնացած 18 ական:
Իհարկե՝ ականները տեղափոխվել եւ վնասազերծվել են, չնայած մասնագետները պնդում են, որ դրանք ոչ մի վտանգ չեն ներկայացրել: Այդուհանդերձ, համապատասխան ատյանները մտավախություն ունեն, որ ստադիոնի տարածքում կարող են էլի ականներ լինել:
Երկրորդ համաշխարհային պատերազմի ժամանակ 1933 թվականին կառուցված ստադիոնի տարածքում գործարանային մի մասնաշենք է եղել, որը 1944-ին ռմբակոծել են դաշնակիցները:
«Mersedes-Benz-Arena»-ն հիմնանորոգման պլանով պետք է վերածվի զուտ ֆուտբոլային ստադիոնի: Նախատեսվում է, որ խաղադաշտը պետք է իջնի 1,3 մետր: Դրա համար էլ շինարարները հողը երկու մետր խորությամբ հանում են: Դրա հաշվին նստելատեղերի քանակն ավելանալու է՝ 50-ից հասնելով 60 հազարի:
