Սա սոցիոլոգ Ահարոն Ադիբեկյանի գնահատականն է: Իսկ ՀՅԴ խմբակցության քարտուղարը նրան համեմատեց «մարած քարտի» հետ:
![\"\"](\"https://www.aravot.am/2009/aravot_arm/June/3/p5.jpg\")
Ադիբեկյանի հետ չի վիճում միայն ՀՀԿ-ն:
Երեկ «Դե ֆակտո» ակումբում իր ասուլիսի սկզբում «Սոցիոմետր» կենտրոնի ղեկավար Ահարոն Ադիբեկյանը հայտարարեց, թե կցանկանար, որ այստեղ գտնվեին ԲՀԿ-ի, ՀՅԴ-ի, ՀԱԿ-ի ներկայացուցիչները եւ Աղասի Արշակյանը, որոնք վիճարկում էին ընտրությունների արդյունքների վերաբերյալ իր հետազոտության տվյալները: Մինչդեռ ըստ նրա՝ ընտրության արդյունքը ցույց տվեց, որ իր սոցհարցումը ներկայացրել է ճշգրիտ պատկեր՝ մի քանի թույլատրելի տոկոսի տատանումով: Մեր կողմից նշենք, որ եթե Երեւանի քաղաքապետին ընտրելու համար ընտրողներ բերեին ոչ միայն Վանաձորից ու Գյումրիից, արձակուրդ ուղարկեին զինծառայողներին, այլեւ ներգրավեին նաեւ Հայաստանի այլ քաղաքների բնակիչներին՝ կպարզվեր, որ Ահարոն Ադիբեկյանը դեռ մի բան էլ փոքր է նշել ՀՀԿ-ի վարկանիշը:
Փորձեցինք հեռակա հանդիպում կազմակերպել՝ պարզելու, թե ինչ կպատասխանեին այն կուսակցությունների ներկայացուցիչները, որոնց մասին ասուլիսում խոսեց Ահարոն Ադիբեկյանը:
Նա ամենաշատն անդրադարձավ ՀՅԴ-ին. «Եթե նրանք այդքան ազնվապատիվ քաղաքական գործիչներ էին եւ նման ընտրությունների արդյունքներ չեն կարող ընդունել, ինչպե՞ս են ընդունել նախագահական եւ խորհրդարանական ընտրությունները: Որովհետեւ տեխնոլոգիան, ընթացքը, եղանակները նույնն են: Ես տարբերություն չեմ տեսնում: Կարող է երանգների տարբերություն լինի, բայց արմատական փոփոխություն չկա: Ուրեմն, երբ որ նրանք 7%-ն անցնում են, դառնում են ԱԺ-ի անդամ, այդ ամենն ընդունելի է: Երբ նրանք ջախջախիչ պարտություն են կրում քաղաքային ընտրություններում՝ դա նրանց համար անընդունելի է: Էլ չեմ խոսում այն վիրավորանքների մասին, որ ուղղում են իմ հասցեին: Միակ պատվիրատուս, որը փորձել է ինձ կաշառել եւ ստիպել տասնապատիկ սխալ անել, եղել են հենց դաշնակները՝ 1992-ին»: Ահարոն Ադիբեկյանը նաեւ նշեց, թե այդ կուսակցությունն «ամենա, ամենա, ամենա անբարոյականն է: Նրանց կարգախոսը գիտեք՝ հին ընկերները չեն դավաճանում: Պարզվում է, դավաճանում են, այն էլ շատ ստոր ձեւով: Լեւոն Տեր-Պետրոսյանը, որ նրանց ոտնատակ տվեց, տրորեց, կոխեց բանտերը, թալանեց նրանց «Երկիր» թերթի խմբագրությունը, այսօր նրանք պատրաստ են ՀԱԿ-ի հետ գնալ համագործակցության՝ որոշ հարցերում: Իսկ այն ուժը, որը նրանց վերակենդանացրեց, բերեց իշխանություն, տեղ տվեց, ոնց որ ասում են՝ բաղնիք տարավ, լվացացրեց, սանրեց, մարդամեջ դրեց՝ նա ուրեմն դարձել է հակառակորդ եւ թշնամի»: Այս հայտարարությունը մեկնաբանելու մեր խնդրանքին ի պատասխան՝ ՀՅԴ խմբակցության քարտուղար Արտյուշ Շահբազյանն ասաց. «Չեմ ուզում նրան այդքան կարեւորել. նա կարեւորելու արարած չի եւ ծիծաղելի է նույնիսկ, Ահարոն Ադիբեկյանին արդեն բոլորը ճանաչում են: Երբ նա հրապարակում է ինչ-որ թվեր՝ կարելի է եզրակացնել, թե ինչ ծրագիր, արդյունքներ է նախապատրաստում իշխանությունը: Այս մասով կարելի է ինչ-որ չափով լսել, թե ինչ է ասում Ահարոն Ադիբեկյանը: Նրա ստի մի դրսեւորումն էլ այդ է, թե մենք համագործակցել ենք ՀԱԿ-ի հետ»: Մեր դիտարկմանը, թե երեւի խոսքը վերաբերում է ՀՅԴ գործիչների այն հայտարարություններին, թե ընտրությունների վերահսկման կապակցությամբ պատրաստ են համադրել ջանքերը նաեւ ՀԱԿ-ի հետ՝ պրն Շահբազյանը պատասխանեց. «Մենք միշտ ասել ենք, նաեւ՝ նախկին ընտրությունների ժամանակ, որ բոլոր նրանց հետ, ովքեր կհամաձայնեն համատեղ վերահսկել ընտրական ընթացքը, նույնիսկ ունենալ համակարգող մի կենտրոն՝ պատրաստ ենք համագործակցության, անկախ նրանից՝ ո՛ր թեւից կլինեն: Թեեւ այդպիսի համագործակցություն չի էլ եղել, բայց մենք միշտ դրան պատրաստ ենք եղել եւ այդ կոչն ուղղված է եղել բոլորի՛ն»:
Իսկ Ադիբեկյանի այն պնդման կապակցությամբ, թե ՀՅԴ-ն փորձել է իրեն կաշառելով փոխել հարցման արդյունքները՝ ՀՅԴ խմբակցության քարտուղարն ասաց. «Որքան տեղյակ եմ՝ եղել է հակառակը: Նա առաջարկել է, որ ՀՅԴ-ն վճարի, որի դիմաց ինքը կտա այն արդյունքը, որը կուզի Դաշնակցությունը»: Նկատենք, որ այս մասին տարիներ առաջ հեռուստաեթերում պատմել էր ՀՅԴ բյուրոյի անդամ Վահան Հովհաննիսյանը: «Իրականությունն այսպես շուռ տալը դրսեւորում է այս մարդու ընդհանուր կերպարը,- ասաց Շահբազյանը:- Ուղղակի խորհուրդ կտամ շատ ականջ չդնել Ադիբեկյանին: Նման մարդիկ հասարակության կողմից ուղղակի պիտի չնկատվեն, որովհետեւ մարած քարտերն ինչքա՞ն կարելի է օգտագործել»:
Սոցիոլոգն ասուլիսում ասաց. «Կցանկանայի, որ այստեղ լիներ Աղասի Արշակյանը, որը ՀԱԿ-ին տալիս էր հիսունքանի տոկոս, ՀՀԿ-ին՝ 20%»: Աղասի Արշակյանն այս կապակցությամբ մեզ ասաց. «Ինքս էլ շատ կուզենայի, որ մասնակցեի այդ հանդիպմանը: Ամեն դեպքում, խնդրելու եմ «Հայելի» ակումբի ղեկավարին, որ առաջին իսկ հնարավորության դեպքում մեզ նորից հրավիրի բանավեճի՝ քննարկենք, թե այդ ո՞ւմ կանխատեսումներն են իրականացել: Իմ կանխատեսումները նույնիսկ 3-րդ եւ 1-ին տեղերի մասով ավելի ճշգրիտ են, քան իրենը, միայն տեղերն են փոխված: Իսկ ՀԱԿ-ի եւ ՀՀԿ-ի տեղերը փոխվել են այն պատճառով, որ շուրջ 130 հազար ձայն է կեղծվել: Սա նշանակում է, որ Երեւանի ամեն 100 բյուլետենից 35-ը կեղծվել է, ինչն էլ տվել է այս արդյունքը: Իսկ դրա մասին ավելի հանգամանալից կխոսենք բանավեճի ընթացքում»:
«Սոցիոմետրի» ղեկավարի մասին այլեւս խոսել չցանկացավ «Բարգավաճ Հայաստանի» պատգամավոր Նաիրա Զոհրաբյանը. «Ահարոն Ադիբեկյանի համար մե՜ծ պատիվ կլինի, եթե նրա ասածները մեկնաբանեն: Մենք իրեն այլեւս չենք անդրադառնալու»: Իսկ սոցիոլոգն ասուլիսում պնդել էր, թե ԲՀԿ ներկայացուցիչները հայտարարում էին, թե իրենք 40%-ն անցնելու են, մինչդեռ ստացան միայն 22%-ը, ինչպես ինքը կանխատեսել էր. «Իրենց կանխատեսումների մեջ «Բարգավաճը» միանշանակ տանուլ է տվել: Նրա խոստումները կամ հավակնությունները չիրականացան: Ճիշտ դուրս եկա ես: Հիմա տեսնենք, ես միշտ գիտեի, որ Ծառուկյանի ոչ թե խոսքն է գործ, այլ գործն է խոսք: Դա՝ միանշանակ»:
Ահարոն Ադիբեկյանը նշել էր, թե չի ցանկանում խոսել «տիգրանկարապետյանների մակարդակի ճիվաղների ու տզրուկների մասին, որոնք մի տոկոս ռեսուրսով ամպագոռգոռ հայտարարություններ են անում, իրենց դաշտում ինչ-որ խաղեր են կազմակերպում ու ասում են՝ ժողովուրդը կգա, ինձ կընտրի, որովհետեւ ես քաղաքականությունից վեր ինչ-որ գործիչ եմ։ Ծաղրանք ա, խեղկատակ ա»: Ժողովրդական կուսակցության նախագահ Տիգրան Կարապետյանը մեզ ասաց, թե չի մեկնաբանելու Ադիբեկյանի ասածները. «Ինքն ինձ համար գոյություն չունի»:
Եվ վերջապես՝ մեջբերենք, որ «Սոցիոմետրի» ղեկավարն ասուլիսում ասաց. «Կցանկանայի այստեղ տեսնել նաեւ այն կենտրոնների մասնագետներին, ովքեր ՀԱԿ-ին տալիս էին 60-80%», եւ հիշեցրեց, որ Լեւոն Զուրաբյանն իրեն հեռակա խորհուրդ էր տալիս ամոթից գետինը մտնել: ՀԱԿ համակարգող Լեւոն Զուրաբյանն «Առավոտին» ասաց. «Իմ խորհուրդը մնում է ուժի մեջ»:
