Օրերս «Մոսկվա» կինոթատրոնում տեղի ունեցավ փաստավավերագրական ֆիլմերի ցուցադրություն: Կինոգետ Նարինե Ջրբաշյանի խոսքով, այդ ֆիլմերը «Հայկ» կինոստուդիայի 2007-2009թթ. արտադրություններից էին: Կինոստուդիայի նախաձեռնությամբ՝ արդեն ավանդական դարձած ֆիլմերի ամենամյա ցուցադրությունում այս անգամ ներկայացվեց 8 ֆիլմ, դրանցից 3-ը պատմական էին, 5-ը՝ դիմանկարային:
Պատմական ֆիլմեր էին՝ Տիգրան Մեծի մասին պատմող «Հայաստանը ՔԱ 1-ին դարում», Թորոս Ռոսլինի հետքերով գնացող եւ մեր նախնիների պատգամներն ու խորհուրդներն արդիականացնող համանուն ֆիլմը եւ 21-րդ դարի վանդալների մասին պատմող «Ցեղասպանությունը»:
Դիմանկարային 5 ֆիլմերից կինոգետ Ն. Ջրբաշյանին հատկապես հիացրել էր դրամատուրգ Պերճ Զեյթունցյանի մասին պատմող «Անձրեւից հետո, անձրեւից առաջ»-ը: Նրա բնորոշմամբ, այդ ֆիլմերը լավագույնս բացահայտեցին հերոսներին. «Ցուցադրված յուրաքանչյուր դիմանկարային ֆիլմ նախ եւ առաջ գեղեցիկ ինքնադիմանկար էր, որտեղ տեսանելի էր յուրաքանչյուր ռեժիսորի անհատականությունը: Այս ֆիլմերը նաեւ ճիշտ կլինի համարել ֆիլմ- մտորում, որովհետեւ մտածելու տեղիք են տալիս»:
