![\"\"](\"https://www.aravot.am/2009/aravot_arm/June/2/p7.jpg\")
Այդպես է անցած ընտրությունները գնահատում «Ժառանգության» ներկայացուցիչը
«Ժառանգություն» խմբակցության ղեկավար Արմեն Մարտիրոսյանը «Առավոտին» փոխանցեց, որ արդեն ժամանակն է, որ ընտրախախտումներին տրվի ոչ թե քանակական, այլ որակական գնահատական. «Արդեն բացահայտ կարելի է ասել, որ տարբեր համայնքներում տեղի ունեցան այնպիսի ընտրություններ, որ եթե վաղ ֆեոդալիզմի ժամանակաշրջանում լինեին ընտրություններ, հենց այդպիսին կլինեին: Մենք տեսանք բացարձակ-հլու-հնազանդ, կիսաբաց ընտրություն: Տիպական օրինակ էր Էրեբունի համայնքում կատարվածը: Նույնիսկ ծեծկռտուք պետք չէր իրականացնել: Վախը արդեն ամբողջովին արմատավորված է այնտեղ: Վերահսկելի քվեարկություն էր՝ բնակարանից մինչեւ քվեատուփ, երբ կոնկրետ անձինք բնակիչներին հատուկ հատկացված մեքենաներուվ տեղափոխում էին ընտրատեղամաս, որտեղ ընտրողների հետ նորից աշխատում էին տարբեր դիտորդական առաքելությունների անվան տակ կոնկրետ շահագրգիռ անձինք, կուսակցությունների ներկայացուցիչներ կամ համակիրներ, որոնք գրանցված էին որպես դիտորդ, վստահված անձ, մինչեւ անգամ՝ հանձնաժողովի անդամ եւ նախագահ: Քվեասենյակներում, որտեղ ես եղա, ըստ էության տիրում էր շուկայական առեւտրի վիճակ, ոչինչ վերահսկելի չէր, վստահված անձինք, դիտորդները հանգիստ մոտենում էին ընտրողներին: Ես, իհարկե, արձանագրություն կազմել եմ, բայց եթե նույն խախտումն անընդհատ կրկնվում է, այդ նույն խախտումն անընդհատ գրանցելը, կարծում եմ, իմաստ չունի, եթե հանձնաժողովը, ավելի շուտ՝ հանձնաժողովի նախագահը ոչ մի քայլ չի ձեռնարկում այդ ամենը կանխելու համար: Եվ եթե դրան գումարում ենք ոստիկանության անգործությունը, երբ բազմաթիվ ահազանգեր եղան ծեծկռտուքների, ահաբեկումների մասին: Տեղամասերի առջեւ բազմագույն հագուստներով՝ սեւից սկսած մինչեւ կանաչ եւ ծիածանի այլ գույներով, տարբեր ֆիզիկական տվյալներով, գերակշիռը սպորտային կազմվածքով, հաղթանդամ անձինք էին կանգնած, ոստիկանությունը «չէր նկատում» այդ անձանց կուտակումները եւ այն, որ նրանք անմիջականորեն, առանց քաշվելու, բոլորի աչքի առաջ զբաղվում էին ընտրողներով, մինչեւ քվեասենյակ մտնելով եւ այլն»: Ըստ Արմեն Մարտիրոսյանի, դատախազությունը եւս անգործ էր. «Ամենից վառ օրինակը այն է, որի մասին ասաց իմ գործընկեր Նաիրա Զոհրաբյանը: Նա ասաց, որ հանձնաժողովի նախագահին օրենքը չպահպանելու, ընտրախախտում կատարելու համար դաստիարակչական ապտակ է հասցրել, բայց ոստիկանությունը հայտարարեց, որ ոչ մի նման փաստ չի արձանագրել: Սա թերեւս ամենավառ ապացույցն է, որ ոստիկանությունը եւ դատախազությունը երեկ անգործունեության էին մատնված միտումնավոր»:
«Առավոտի» հարցերին՝ ի վերջո «Ժառանգությունը» համարո՞ւմ է ընտրությունները կայացած, կամ՝ ինչո՞ւ Դաշնակցությունը եւ «Օրինաց երկիրը» դուրս մնացին խաղից, եւ ի՞նչ կանխատեսում ունի՝ ՀԱԿ-ը կընդունի՞ ընտրության արդյունքները եւ կդառնա՞ Երեւանի ավագանու անդամ (հարցազրույցի պահին ՀԱԿ-ի որոշման մասին հայտնի չէր), պարոն Մարտիրոսյանը ասաց, որ ՀԱԿ-ի գնալ-չգնալը հենց ՀԱԿ-ը կորոշի, բայց «եթե նախընտրական տրամաբանությամբ առաջնորդվենք, ՀԱԿ-ը Երեւանի ավագանու ընտրությունը դիտարկում էր որպես նախագահական ընտրության երկրորդ փուլ: Կարծում եմ՝ ՀԱԿ-ը չի գնա եւ չի դառնա Երեւանի ավագանի, որովհետեւ նախագահական երկրորդ փուլում ավագանու տեղեր չեն բաշխվում»: «Օրինաց երկիր» կուսակցության եւ Դաշնակցության խաղից դուրս մնալը եւ 7 տոկոսի շեմը չհաղթահարելը, «Ժառանգության» ներկայացուցչի կարծիքով, չարժե քննարկել այն պատճառով, քանի որ այս ընտրությունները որեւէ աղերս չունեն ընտրություն կոչվող գործընթացի հետ, հետեւաբար, անիմաստ է փաստերի մասին խոսել եւ արձանագրել դա որպես իրողություն, հասարակության միջեւ եղած ուժերի հարաբերակցություն: «Անկեղծորեն ասեմ, առավել եւս ինձ համար խիստ անհասկանալի է, որ Դաշնակցությունը ավելի քիչ ձայներ ստացավ, քան «Օրինաց երկիրը», քանի որ Դաշնակցությունը ունի իր կայուն ընտրազանգվածը, եւ այս ընտրազանգվածը բավականին կարգապահ է, տանը չի նստում եւ իր ընտրությունը միշտ ճշգրտորեն կատարում է: Այս ամենը հաշվի առնելով, պետք է ասեմ՝ ինձ համար ցավալի է, որ Դաշնակցությունը 7 տոկոսի շեմը չհաղթահարեց, եւ երկրորդ՝ սա եւս մեկ անգամ ապացուցում է, որ մայիսի 31-ը քվեարկություն կոչված գործընթացի հետ ոչ մի կապ չուներ»,- ասաց պատգամավորը:
