Երեկ առավոտից մինչեւ ուշ երեկո մենք շրջել ենք նաեւ Երեւանի Նոր Նորք համայնքի թիվ 2 ընտրատարածքի տասնյակ ընտրական տեղամասերում: Այս համայնքում անցկացված ընտրությունները մայրաքաղաքի մյուս համայնքներից ոչնչով առանձնահատուկ չէին: Կեսօրից հետո մեր այցելած մեկ տասնյակից ավելի տեղամասերում ասում էին, թե քվեարկությունը նորմալ է ընթանում, բայց այ, տեղամասերից դուրս, դրանց հարող տարածքներում փող բաժանելը համատարած բնույթ էր կրում: Փող բաժանվում էր ոչ միայն տեղամասերի մոտ կանգնած «Գազելներից», այլեւ ավտոտնակներից: Օրինակ՝ Նոր Նորքի 5-րդ զանգվածում մեր ֆոտոխցիկը արձանագրեց, թե ինչպես շենքերի արանքում գործող մի ավտոտնակի ներսում, հենց մուտքի մոտ, մի սեղանիկ էր դրված, որտեղ մարդիկ ելումուտ էին անում եւ ուղեւորվում մոտակա ընտրատեղամասեր: Ընդհանրապես, երեկ Նոր Նորքում իրավիճակը հատկապես լարված էր, որովհետեւ ոչ մի կերպ իրար հետ լեզու չէին գտնում ՀՀԿ-ի եւ ԲՀԿ-ի թիմերը: Մենք ներկա էինք 02/04 տեղամասում անցկացված հաշվարկին: Այստեղ դեռ կեսօրից հետո ահազանգել էին 301 կորած քվեաթերթիկների մասին: Հաշվարկի արդյունքում թեեւ այդ փաստն արձանագրվեց, սակայն հանձնաժողովի որեւէ անդամ չցանկացավ ստորագրել «Ժառանգություն» կուսակցության հանձնաժողովի անդամի՝ տիկին Մարգարիտայի առաջարկած արձանագրության տակ: Մեր տեղեկություններով, այդ արձանագրությունն այսօր, այնուամենայնիվ, տիկին Մարգարիտայի եւ ՀԱԿ-ի վստահված անձի կողմից կուղարկվի ՀՀ ԿԸՀ:
Իսկ հաշվարկի արդյունքում այս տեղամասում առաջատարը ԲՀԿ-ն էր՝ 410 ձայն: ՀԱԿ-ը ստացել էր 136 քվե: 210 ընտրող քվեարկել էր հօգուտ ՕԵԿ-ի, բայց քվեաթերթիկում կատարված, տեղ-տեղ նաեւ կարմիր թանաքով արված նշումներից պարզորոշ երեւում էր, որ դրանք արված են միեւնույն ձեռագրով: Հանձնաժողովականներից ոմանք քթների տակ արձանագրեցին, թե ՕԵԿ-ը լավ «կարուսել» է արել:
