Ինչպես տեղեկացնում է «Նոյյան տապանը», Լիբանանում, Բուրջ Համուդի քաղաքապետարանի մարզադաշտին կից տարածքում մայիսի 24-ին տեղի է ունեցել Բուրջ Համուդի հայկական նոր վարժարանի հիմնադրման արարողությունը՝ Մեծի Տանն Կիլիկիո կաթողիկոս Արամ Առաջինի հովանավորությամբ: Միջոցառմանը ներկա են եղել պետական այրեր, գաղութի պատկան մարմինների ներկայացուցիչներ, հոգեւորականներ եւ հյուրեր: Լիբանանահայոց հոգեւոր առաջնորդ Գեղամ եպիսկոպոս Խաչերյանն իր խոսքում շեշտել է, որ կառուցվելիք Ազգային նոր վարժարանը իր սահմաններով շատ ավելի հեռուն է տարածվում, քան այդ փոքրիկ տարածքը: «Ազգային վարժարանները մեր ժողովրդի վերականգնումի վկաներն են,- ավելացրել է առաջնորդ սրբազանը:- Սա խոսուն վկայություն է, որ Լիբանանի հայությունը կենսունակ, ժիր եւ գործունյա է»:
Արարողության ավարտին Արամ Ա կաթողիկոսը փոխանցել է իր պատգամը: «Այսօր դուք՝ իբրեւ լիբանանահայություն, եւս մեկ անգամ եկել եք վկայելու, որ լիբանանահայությունը ոչ միայն վերականգնվել է, այլեւ իր կյանքի առջեւ բացել է գործունեության, կենսունակության նոր ընթացք»,- շեշտել է Արամ Ա կաթողիկոսը, ավելացնելով, որ ինքը մոտիկից հետեւում է լիբանանահայության բոլոր աշխատանքներին եւ ուրախությամբ նկատում է, որ նրա կյանքում եռուզեռ, կենսունակություն, աշխուժություն, ծրագրեր եւ աշխատանքներ կան. «Բուրջ Համուդը ոգի է, հավատք է, կամք է, տեսիլք է, պայքար է, կեցվածք է, ծառայություն է, դպրոց է, այլ խոսքով՝ մեր կյանքի ամենանվիրական արժեքների խտացումն է»: Նորին սրբությունը ասել է նաեւ, որ բոլորի նվիրական պարտավորությունը պետք է լինի ամեն օր քարի վրա քար ավելացնել, որպեսզի շուտով դպրոցը շենք դառնա, շենքը՝ ոգի ու առաքելություն դառնա ժողովրդի կյանքում:
