Որոշ դեղամիջոցներ ստիպում են, որ կինն ինքնակամ հանվի ու նետվի տղամարդու գիրկը
Սեռական կյանքը բազմազանությամբ հարստացնելու եւ սեքսը վայելելու համար մարդիկ ինչ միջոցների ասես, որ չեն դիմում. «Կամասուտրան» անգիր անելուց, պոռնոֆիլմեր դիտելուց սկսած՝ մինչեւ սեռական կարողությունները ակտիվացնող հաբեր ընդունելը: Տղամարդկանց պոտենցիան բարձրացնող միջոցներից զատ, կան նաեւ պրեպարատներ՝ հեղուկ կաթիլների, գելի, նույնիսկ մաստակի տեսքով, որոնք կանանց մեջ ընդամենը մի քանի րոպեից ուժգին սեռական ցանկություն են առաջացնում: Մայրաքաղաքի դեղատներից մեկի աշխատակցի ներկայացմամբ՝ այս միջոցներից, ցավոք, օգտվում են նաեւ անչափահաս, անփորձ ու խարդախ տղամարդիկ, ովքեր ընդունակ չեն կնոջ սիրտը գրավել ասպետական մեթոդներով: Դեղատան աշխատակցի խոսքերով՝ «Այդ միջոցները շատ հաճախ գնում են երիտասարդները, նույնիսկ 10-րդ դասարանցիները: Շատ դեպքեր գիտեմ, որ նույնիսկ աղջկանից թաքուն հյութի մեջ են լցրել, ու պատկերացնո՞ւմ եք խեղճ աղջկա վիճակը: Հետաքրքիրն այն է, որ այսքան տարի աշխատում եմ, ոչ մի օր չեմ հիշում, որ կանայք կամ աղջիկներ գնեն այդ կաթիլները, միայն տղաներն են գնում»:
«Գրգռիչ» մաստակները 3 րոպե ծամելուց հետո ցանկած կին կնետվի տղամարդու գիրկը, թերեւս ճիշտ կլինի այն հյուրասիրել կնոջը միայն իր համաձայնությամբ: Բայց այն տղամարդիկ, որոնք կնոջը տհաճ են, հույս չունենան, թե մաստակներն ու կաթիլները հյուրասիրելով՝ կտիրանան իրենց համար ցանկալի կնոջը: Մասնագետները վստահեցնում են, որ այդ միջոցներն ազդում են ֆիզիոլոգիապես, մինչդեռ անհրաժեշտ է նաեւ հոգեբանական ազդեցություն, ինչը կաթիլներն ու մաստակը չեն ապահովում:
«Ես հիվանդ եմ ունեցել. նրան զոռով ամուսնացրել են մի կնոջ հետ, որից՝ բառիս ուղիղ իմաստով, զզվում էր: Այդ տղամարդուն նշանակել էի ցանկություն առաջացնող դեղամիջոց ու ասել, որ գուցե սեքսից հետո ամեն ինչ լավ լինի նրանց փոխհարաբերություններում: Մի քանի ամիս հետո երիտասարդը եկավ ու ասաց, որ սեքը լինում է, բայց, միեւնույն է, կինն իր համար տհաճ է: Այսինքն՝ այդ պրեպարատները հոգեբանական ազդեցություն չեն ունենում, ինչը նման դեպքերում շատ կարեւոր է»,- «Առավոտին» ասաց բժիշկ-սեքսապաթոլոգ Հրաչյա Պապյանը:
Արդյոք, այդ միջոցները կօգնե՞ն նաեւ ֆրիգիդ կանանց, Հ. Պապյանն ասաց. «Նախ պետք է պարզել, թե ֆրիգիդությունն ինչից է առաջացել: Կարող են լինել դեպքեր, որ ազդի»:
Այդ «գրգռիչ» միջոցները, բժիշկների հավաստմամբ, առողջության համար անվտանգ են, եթե, իհարկե, կինը խաբված չէ:
«Գրգռիչ» պրեպարատներից ավելի լայն տարածում ունեն տղամարդկանց համար նախատեսվածները՝ վիագրան, վեգարան, սիալիսը եւ այլն, սակայն, ինչպես դեղատան աշխատողներն են պնդում, դրանք շատ հաճախ գնում են նաեւ այն մարդիկ, որոնք առանց դրա էլ կարող են յոլա գնալ: Դեղատան աշխատակցի պատմելով. «Չնայած մեր ֆունկցիան չէ հարց ու փորձ անել, բայց մի երկու հարցից պարզում ենք, որ իրենք նորմալ տղամարդ են: Պարզապես, ուզում են վիագրա ընդունել, որպեսզի մի գիշերում մի 10 անգամ սեքս անեն: Եվ քանի որ վիագրան վաճառվում է առանց դեղատոմսի, մենք էլ տալիս ենք»: Դեղատան աշխատակցի ներկայացմամբ, շատ հայ տղամարդիկ ամաչում են ասել, որ հենց իրենց համար են գնում վիագրա, պատճառաբանում են, իբր ընկերոջն են ուզում օգնել եւ այլն: Վիագրայի գնորդները հիմնականում 23-30 տարեկան տղամարդիկ են, սակայն այդ պրեպարատը պահանջարկ ունի նաեւ միջին տարիքի տղամարդկանց, անչափահասների, նույնիսկ պապիկների շրջանում. «Օրինակ՝ վիագրա շատ գնում են, այսպես ասած, արդեն իրենց սեռական կյանքի մայրամուտն ապրող տղամարդիկ: Դե գալիս են, ասում՝ ախպեր ջան, չեմ հասկանում ինչ ա կատարվում՝ մեկ ստացվում ա, մեկ՝ չէ: Կարո՞ղ ա վիագրա ունենաք: Ես էլ չեմ խորանում, բայց ասում եմ, որ ալկոհոլի եւ սրտի դեղերի հետ չխմեն, որովհետեւ հնարավոր է վնասի»:
Փաստորեն, եթե որոշ դեպքերում պոռնոֆիլմեր դիտելը, «Կամասուտրան» գործնականում օգտագործելն իսկապես օգնում է տղամարդկանց հաճույք ստանալ, ապա սեռական կարողությունները ակտիվացնող հաբերը ոչ բոլորին են օգնում: Մեզ հետ զրույցում Հ. Պապյանը վստահեցրեց, որ սրտանոթային կամ ճնշման տատանումներ ունեցող հիվանդներին, սրտի դեղամիջոցներ օգտագործողներին կատեգորիկ չի թույլատրվում վիագրա օգտագործել. «Եթե այդ դեղամիջոցների հետ միաժամանակ իրենք վիագրա ընդունեն, տեղն ու տեղը կմահանան: Իսկ ալկոհոլի հետ ընդունելու դեպքում, հնարավոր է ալերգիկ ռեակցիա ունենան, բայց դա չարիքի փոքրագույնն է»:
Մեր այն հարցին, որ եթե տղամարդու մոտ անկարողություն է, անպայման պետք է վիագրայի օգնությա՞նը դիմեն, պարոն Պապյանն ասաց. «Լավ կլինի բժշկի մոտ հետազոտվեն, նոր ընդունեն: Քանի որ սեռական անկարողությունը կարող է ընդամենը հոգեբանական վիճակից լինի, ասենք՝ մի բանից, այսպես ասած, «մանթրաշ» է ընկել ու չի ստացվել: Ներշնչելով «նստում» են վիագրայի վրա եւ իրենց մեջ վախ է առաջանում, որ առանց վիագրայի չեն կարողանա հարաբերություն ունենալ, դրա համար էլ անընդհատ սկսում են օգտագործել: Հնարավոր է անկարող մեկը ընդունի ու ամեն ինչ նորմալ լինի: Բայց ինչ վերաբերում է նրան, որ տղամարդը մի քանի տարի ոչ մի բան չի արել, հնարավոր չէ վիագրայով բուժվի: Վիագրան պանացեա չէ, վիագրան հրաշքներ չի կարող գործել: Բայց հնարավոր է, շատ ներշնչվող մարդ է, գիտի, ասենք, ընկերը խմել է ու ամեն ինչ շատ լավ է եղել, այ, ինքն էլ կխմի ու հոյակապ կլինի, իհարկե, դա նաեւ աղջկանից է կախված, տրամադրությունից, հնարավոր է՝ ինչ-որ բան ստացվի, մարդը իր ուժերի նկատմամբ վստահություն ձեռք բերի ու դառնա գիգանտ, բայց դա խորը, լուրջ բուժում չէ»:
