Իսրայելում հրաժեշտի համերգի դահլիճի փոփոխության եւ ամսաթվի տեղափոխման, ինչպես նաեւ այդ ամենին մամուլում հաջորդած մեծ աղմուկի պատճառով՝ Ալլա Պուգաչովան պահանջել է անհապաղ զննել բոլոր համերգային դահլիճները, որտեղ նա պետք է ելույթ ունենա «Սիրո մասին երազներ» շոու-ծրագրով։
Ըստ tert.am-ի, Պուգաչովայի գրասենյակի տնօրեն Ելենա Չուպրակովան նոր է վերադարձել Երեւանից։ Ինչպես պարզվել է, այստեղ նույն վիճակն է, ինչ Իսրայելում. բեմում չեն կարող տեղավորվել բոլոր անհրաժեշտ դեկորացիաները։ Ինչպես Հայաստանում, այնպես էլ Իսրայելում երգչուհին հրաժարվում է ելույթ ունենալ առանց սառցաբեկորի եւ հսկայական էկրանների, որոնք ստեղծել է Բորիս Կրասնովը՝ հատուկ հրաժեշտի շրջագայության համար։ Սակայն համերգի ամսաթվի տեղափոխման մասին խոսակցություններ առայժմ չկան։
«Հայաստանի մայրաքաղաքում Պուգաչովան ելույթ կունենա սեպտեմբերի 25-ին, ինչը նշանակում է, որ մենք ժամանակ ունենք վերացնել բոլոր տեխնիկական անհարթությունները՝ առանց համերգի օրը փոխելու»,- նշել է Չուպրակովան «Комсомольская правда»-ին տված հարցազրույցում։
