Հանցավոր խմբի պարագլուխները ոստիկաններ էին
![\"\"](\"https://www.aravot.am/2009/aravot_arm/May/26/p6.jpg\")
![\"\"](\"https://www.aravot.am/2009/aravot_arm/May/26/p4.jpg\")
Ամբաստանյալները, ի տարբերություն մեր ճաղավանդակների, «թաքնվում» էին ապակեպատ խցում:
Մեղադրող Գալինա Կարպովան՝ միջնորդության պահին:
![\"\"](\"https://www.aravot.am/2009/aravot_arm/May/26/p5.jpg\")
![\"\"](\"https://www.aravot.am/2009/aravot_arm/May/26/p3.jpg\")
Մեր հայրենակիցները՝ տուժողներ:
Դատավոր Պյոտր Շտունդերը հրապարակեց դատավճիռը:
Օրեր առաջ Մոսկվայի քաղաքային դատարանում ավարտվեց 7 հոգուց բաղկացած բանդայի դատավարությունը: Նրանք կատարել էին 10 սպանություն եւ 18 ավազակային հարձակում: Խմբի անդամների մեջ կան ոստիկանության նախկին եւ ներկա աշխատակիցներ: Նրանց մի մասը դատապարտվեց 9-26 տարվա ազատազրկման, իսկ բանդան ղեկավարող ոստիկանության նախկին աշխատակիցներ Դմիտրի Սյոմինին եւ Եվգենի Ֆեոդորովին Մոսկվայի քաղաքային դատարանը դատապարտեց ցմահ ազատազրկման:
Հիշեցնենք, որ նրանք 2004 թվականի նոյեմբերի 1-ին մեր հայրենակիցներ Արմեն Խոջոյանի եւ Իգոր Առուշանյանի ավտոմեքենան կանգնեցրել էին Մոսկվա քաղաքում: Վերջիններս րոպեներ առաջ էին դուրս եկել բանկից եւ իրենց մոտ ունեին բավականին մեծ գումար: Հանցագործները ստուգել էին փաստաթղթերը, ասելով, որ ինչ-որ խնդիրներ կան փաստաթղթերում, Արմենին ու Իգորին ուղեկցել էին դեպի իրենց ավտոմեքենան, ձեռնաշղթայել էին նրանց եւ տարել անհայտ ուղղությամբ:
Անտառում մեր հայրենակիցներին նրանք դուրս էին բերել ավտոմեքենայից, ծեծել, կտտանքների ենթարկել, թալանել նրանց ու գրեթե մահամերձ թողել այնտեղ, հույս ունենալով, թե արնաքամ կլինեն: Սակայն նրանց գտել էին եւ տեղափոխել Ձերժինսկ քաղաքի հիվանդանոց: Այժմ 33-ամյա Արմեն Խոջոյանն առաջին կարգի հաշմանդամ է: Հիշեցնենք նաեւ, որ բանդայի անդամներին բավականին ժամանակ հնարավոր չէր բռնել: 2007 թ. Մոսկվայի Կրասնոխոլմսկի կամրջի վրա նրանց արագ սլացող «Ջիպ» ավտոմեքենան կանգնեցրել է պետավտոտեսչության աշխատակից Դմիտրի Ժուչկովը: Նրանք ներկայացել են որպես ոստիկանության աշխատակիցներ: Երբ Ժուչկովը հանցագործների ավտոմեքենայում նկատել է ձեռնաշղթայված մի մարդու՝ պահանջել է փաստաթղթեր: Նրանք, կրակ բացելով Ժուչկովի վրա, սպանել են նրան: Այս դեպքից հետո իրավապահ մարմինները լուրջ ջանքեր սկսեցին գործադրել՝ բանդային հայտնաբերելու համար:
Դատավճիռը կարդալու ժամանակ մեղադրյալները ծածկել էին իրենց դեմքերը թերթերով: Դատավոր Պյոտր Շտունդերը գրեթե երկու ժամ կարդաց մեղադրական դատավճիռը:
