Չարբախի շները հազում են

Երեկ «Առավոտի» խմբագրություն էին դիմել իրենց շների առողջությամբ անհանգստացած Չարբախի բնակիչներ, որոնց խոսքերով՝ թաղամասի բոլոր շներն արդեն մեկ շաբաթից ավելի հազում են եւ ժամանակ առ ժամանակ՝ փսխում: Բնակիչների կարծիքով, շների ինքնազգացողությունը վատացել է օրերս «Նաիրիտում» տեղի ունեցած պայթյունի արդյունքում մթնոլորտ արտանետված թունավոր նյութերի պատճառով:

Արդյո՞ք շները կթունավորվեին «Նաիրիտի» արտանետումներից՝ «Առավոտը» փորձեց ճշտել անասնաբույժներից: Մեզ հետ զրույցում անասնաբույժներից մեկը պարզաբանեց, որ շները ոչ թե թունավորվել են, այլ, ամենայն հավանականությամբ, հազում են շներին հատուկ վիրուսի պատճառով: Բժիշկների խոսքերով, վիրուսը հաստատելը չափազանց դժվար է, քանի որ պարզելու համար պետք է կենդանիներին հետազոտել, որը Հայաստանում հնարավոր չէ, քանի որ անասնաբուժական լաբորատորիա գոյություն չունի: Նրանք Չարբախի շուն պահող բնակիչներին խորհուրդ տվեցին չանհանգստանալ, ասելով, որ որոշ ժամանակի հետո շների հազը կանցնի: