![\"\"](\"https://www.aravot.am/2009/aravot_arm/May/23/p11.jpg\")
Մայիսի 23-ին Սյունիքի մարզի դպրոցներում մոտ 2000 շրջանավարտների համար կհնչի «վերջին զանգը»: Մարզկենտրոն Կապանում մոտ 600 շրջանավարտ կա, Գորիսում եւ Սիսիանում՝ 500-ական: Այս տարի Սյունիքի մարզում ուսումնական հաստատություններին հրաժեշտ է տալիս նույնքան շրջանավարտ, որքան անցած տարի: Համաքաղաքային ավանդական միջոցառումներ կկազմակերպվեն դպրոցականների համար, սակայն այս տարի «վերջին զանգի» տոնական համերգին մայրաքաղաքից աստղեր չեն հրավիրվի: Ըստ Սյունիքի մարզպետարանի մշակույթի բաժնի պետ Սարգիս Դավթյանի, տոնական միջոցառումները կկազմակերպվեն տեղի ոչ պակաս շնորհալիների ու ստեղծագործական խմբերի մասնակցությամբ:
Կապանում համերգը կմեկնարկի ժամը 17-ին եւ կավարտվի ժամը 22-ին՝ հրավառությամբ: Համերգներ կլինեն նաեւ Գորիսում եւ Սիսիանում: Տոնակատարություններին անմասն չեն մնա նաեւ 180 մեղրեցի շրջանավարտները: Տոներից հետո քննություններն են, որոնց առավել լարված են պատրաստվում եւ սպասում ոսկե մեդալի 43 հավակնորդները: Ըստ մարզպետարանի կրթության բաժնի, այս տարի ոսկե մեդալի հավակնորդների քանակը ավելացել է: Նախորդ տարի 39 էր: Սրան հակառակ, նվազել է պետական միասնական քննություն հանձնողների թիվը: 1964-ից միայն 800-ն է միասնական քննություն հանձնելու:
