Երեւանյան լճում կայացավ թիավարության բայդարկա եւ կանոե մրցաձեւերի Հայաստանի բաց առաջնությունը, որին մասնակցելու էին ժամանել նաեւ Վրաստանի ներկայացուցիչները: Ընդհանուր առմամբ առաջնությանը մասնակցեց 92 հոգի:
Բայդարկա ձեւում ակնհայտ էր հայաստանցի միջազգային կարգի սպորտի վարպետներ Արամ Անդրեասյանի եւ Գեւորգ Ասմարյանի առավելությունը: Նրանք երկտեղանոց նավակով եզրագիծն առաջինը հատեցին 200, 500 եւ 1000 մետր մրցատարածություններում: Մեկտեղանոց բայդարկաների պայքարում Գեւորգն առաջինն էր նաեւ 200 եւ 500, իսկ Արամը՝ 1000 մետրում:
Կանոեիստների պայքարում մրցակցությունից դուրս էին վրացիները, որոնք հաղթեցին բոլոր մեկնարկներում: Նրանցից աչքի ընկավ հատկապես Շալվա Խիզանիշվիլին:
Մեր վերոնշյալ երկու թիավարողները, ընկերակցելով Տիգրան Սարգսյանի եւ Կարեն Միրզոյանի հետ, հավասարը չունեցան նաեւ չորս տեղանոց նավակների՝ 500, իսկ Վլադիմիր Աղաջանյան, Դավիթ Հարությունյան, Արթուր Թադեւոսյան եւ Մանվել Պալատանյան երիտասարդական քառյակը՝ 1000 մետր մրցատարածությունում:
Մրցումների ավարտին Հայաստանի հավաքականի գլխավոր մարզիչ Հարություն Գասպարյանը, խոսելով առաջնության եւ ֆեդերացիայի հետագա ծրագրերի մասին, ասաց, որ գրանցված արդյունքներն իրեն բավարարում են, որ երիտասարդական քառյակը, ինչպես նաեւ Հայկ Գասպարյանն ու հրազդանցի Անահիտ Հովհաննիսյանը նախապատրաստվում են եկող տարի Սինգապուրում կայանալիք պատանիների անդրանիկ օլիմպիական խաղերին եւ այնտեղ հաջող հանդես գալու լավ հնարավորություններ ունեն: Իսկ ավելի մոտ ապագայում՝ հուլիսի 25-28-ը, Արամ Անդրեասյանն ու Գեւորգ Ասմարյանը կմասնակցեն Գերմանիայում կայանալիք Եվրոպայի առաջնությանը:
