Արարատյան դաշտավայրի շուրջ 36 հազար հեկտար հողատարածքի մշակման համար պահանջվում է ՀՀ գյուղատնտեսության նախարարության հաշվարկած՝ ոռոգման ջրի օգտագործման միջին նորմայից բարձր ծավալներ, եւ արդյունքում՝ դժվարանում է օգտագործված ոռոգման ջրի դիմաց հասույթների հավաքագրումը, ինչպես նաեւ թանկանում է այդ հողատարածքի վրա մշակված գյուղմթերքի ինքնարժեքը: Հայաստանի կառավարությունը փորձում է հարցը կարգավորելու համար միջոցներ գտնել եւ այդ նպատակով ՀՀ տարածքային կառավարման նախարար Արմեն Գեւորգյանը հանդիպել է Համաշխարհային բանկի (ՀԲ) երեւանյան գրասենյակի տնօրեն Արիստոմենե Վարուդակիսին:
Նախարարությունից տեղեկացանք, որ Արմեն Գեւորգյանը ասել է, թե հաշվի առնելով խնդրի սոցիալական բնույթը, կառավարությունը փորձում է այդ հողատարածքները մշակող գյուղացիների աշխատանքը դարձնել ավելի եկամտաբեր: Համաշխարհային բանկի ներկայացուցիչը խոստացել է սեղմ ժամկետներում ՀԲ հայաստանյան ներկայացուցչությունում ձեւավորել խումբ, որը համապատասխան գերատեսչությունների հետ կսկսի ոլորտի խնդիրների ուսումնասիրությունը:
