«Այբ» կրթական հիմնադրամից երեկ տեղեկացանք, որ ամփոփված են «Կենգուրու 2009» միջազգային մաթեմատիկական մրցույթի արդյունքները: Մրցույթն այս տարի առաջին անգամ մարտի 19-ին անցկացվեց ՀՀ ամբողջ տարածքով, որին մասնակցեցին բոլոր մարզերից 570 դպրոց եւ 30000-ից ավելի աշակերտ:
Երեկ «Կենգուրուին» մասնակցած բոլոր դպրոցներին փոստով ուղարկվեցին իրենց աշակերտների արդյունքների վերաբերյալ ամփոփ հաշվետվություններ, որտեղ մանրամասն ներկայացված են յուրաքանչյուր երեխայի արդյունքները, նրա գրաված տեղը իր դպրոցում, մարզում, հանրապետությունում եւ այլ տվյալներ: Արդեն հայտնի են հաղթող եւ լավագույն արդյունքներ ցուցաբերած երեխաների անունները: Մայիսի վերջին եւ հունիսի առաջին օրերին ՀՀ բոլոր մարզերում տեղի կունենան մրցանակաբաշխության միջոցառումներ, որոնց մանրամասն ժամանակացույցը՝ ըստ մարզերի, զետեղված է www.kangaroo.am կայքում: «Կենգուրուի» մասնակից բոլոր դպրոցներն ու երեխաները կստանան մասնակցության հավաստագրեր, լավագույն արդյունք ցուցաբերած երեխաները՝ նաեւ պատվոգրեր ու խրախուսական մրցանակներ, իսկ հաղթողներին սպասվում են նաեւ եվրոպական երկրներում կազմակերպվող ամառային ճամբարի ուղեգրեր: Մրցույթի բացառիկ կազմակերպիչն է «Այբ» կրթական հիմնադրամը: Մրցույթն անցկացվում է ՀՀ ԿԳՆ հովանու ներքո:
