![\"\"](\"https://www.aravot.am/2009/aravot_arm/May/20/p19.jpg\")
Երեկ տեղեկացանք, որ երկու թիմեր՝ Արգենտինայի եւ Թուրքմենիայի հավաքականները չեն մասնակցի բռնցքամարտի աշխարհի պատանիների առաջնությանը:
Արգենտինայի բռնցքամարտի ֆեդերացիան պաշտոնապես հրաժարվել է մասնակցել մայիսի 23-30-ը Երեւանում կայանալիք ԱԻԲԱ բռնցքամարտի աշխարհի պատանիների 2009 թ. առաջնությանը: Հայաստանի բռնցքամարտի ֆեդերացիային հղած պաշտոնական նամակի համաձայն՝ հրաժարվելու պատճառները վարչական խնդիրներն են: Արգենտինան առաջնությանը մասնակցելու հրավերին արձագանքած առաջին երկրներից էր, որը պատրաստվում էր Երեւան գալ 3 մարզիկներով: Այս մասին տեղեկացնում են ՀՀ բռնցքամարտի ֆեդերացիայի մամուլի կենտրոնից:
Իսկ ինչ վերաբերում է Թուրքմենիայի հավաքականին, ապա ըստ ՀՀ բռնցքամարտի ֆեդերացիայի մամուլի կենտրոնի՝ այդ երկրի բռնցքամարտի ֆեդերացիան մասնակցության հայտ ուղարկելուց հետո մինչ օրս չէր հայտավորել մարզիկներին, եւ նրա վերջնական եզրակացությունը անակնկալ չէր: Հիշեցնենք, որ առայսօր հայտ ներկայացրած երկրներից 4-ը՝ Մեքսիկան, Ուելսը, Արգենտինան եւ Թուրքմենստանը, հրաժարվել են մասնակցությունից: Արդյունքում մասնակիցների թիվը ներկայումս կազմում է 49 երկիր:
