Ամերիկյան հակահրթիռային համակարգը, որը նախատեսվում է տեղադրել Արեւելյան Եվրոպայում, չի կարողանա պաշտպանել այն հրթիռներից, որոնք մոտ ապագայում կունենա Իրանը: Ըստ newsru.com-ի՝ այդպիսի եզրակացության են եկել ռուսաստանցի եւ ամերիկացի գիտնականները: Զեկույցը, որը պատրաստվել է EastWest Institute անկախ վերլուծական կենտրոնի կողմից, էլ ավելի կսառեցնի Օբամայի ցանկությունը՝ հակահրթիռային համակարգեր տեղադրել Լեհաստանում եւ Չեխիայում:
Զեկույցի հեղինակները՝ 6 գիտնական ՌԴ-ից եւ 6 գիտնական ԱՄՆ-ից, արձանագրում են, որ Իրանը հսկայական տեխնիկական առաջընթաց է ապրել: Փորձագետները կանխատեսում են, որ Թեհրանը ամենապարզ ատոմային ռումբը կունենա մոտակա երեք տարվա ընթացքում, եթե կարողանա արտաքսել ՄԱԳԱՏԵ-ի տեսուչներին եւ սկսել հարստացված ուրանի արտադրությունը: Եվս հինգ տարի է անհրաժեշտ, մասնագետների կարծիքով, մարտագլխիկներ մշակելու, ու եւս՝ վեց-ութ տարի՝ Հարավային Եվրոպա հասնող հրթիռներ արտադրելու համար: Որպեսզի Իրանի հրթիռները հասնեն ԱՄՆ տարածք, անհրաժեշտ է եւս տասը տարի կամ օտար պետության անօրինական օգնություն: Հակահրթիռային համակարգեր տեղադրելու փոխարեն, փորձագետները կոչ են անում ԱՄՆ-ին եւ ՌԴ-ին՝ համատեղ զբաղվել Իրանի խնդրով:
