Օրերս ԵՊՀ իրավագիտության ֆակուլտետում կազմակերպվեց հերթական դատախաղը՝ քրեական դատավարությունից: Այն առանձնանում էր նրանով, որ դատավարության կողմերը ներկայացնում էին ոչ միայն ԵՊՀ իրավագիտության ֆակուլտետի, այլ նաեւ՝ Եվրոպական կրթական տարածաշրջանային ակադեմիայի ուսանողները: Նման միջոցառումները հնարավորություն են տալիս ուսանողներին ծանոթանալու որոշակի հարցերի առնչությամբ միմյանց տեսակետներին, կոնկրետ իրավիճակներում լուծումներ գտնելու տարբերակներին, եւ, որ ամենակարեւորն է, բացառիկ հնարավորություն են հանդիսանում տարբեր բուհերում սովորող ուսանողների սերտ շփումների համար: Դատական նիստը նախագահում էր Աջափնյակ եւ Դավիթաշեն համայնքների առաջին ատյանի դատարանի դատավոր Վազգեն Ռշտունին: Նա տպավորված էր մասնակիցների գիտելիքներով, հմտություններով ու պատրաստակամություն հայտնեց հետագայում եւս ընդունել նման միջոցառումներին մասնակցելու հրավերները: Դատական նիստին հետեւում էին նաեւ աշակերտներ, որոնք ցանկանում են դառնալ իրավաբան: Դատախաղն ավարտվեց ջերմ եւ բարեկամական մթնոլորտում, քանզի դատարանի որոշումը բխում էր երկու կողմերի շահերից:
