Ռուսաստանը կտաքացնի Թուրքիային

Շաբաթ օրը Ռուսաստանի վարչապետ Վլադիմիր Պուտինը հանդիպեց իր թուրք գործընկեր Ռեջեփ Էրդողանի հետ: Ինչպես հաղորդում է «Գազետա» թերթը, վերջինս շնորհակալություն է հայտնել Պուտինին՝ ձմեռվա շրջանում ամեն տարի հատկացվող օգնության համար, երբ մնացած գործընկերները կրճատում են գազի մատակարարման ծավալները: «Ռուսաստանը երբեք մեզ հուսախաբ չի արել գազի մատակարարման հարցում,- ասել է Էրդողանը,- երբ մենք դժվարություններ ենք ապրում, Ռուսաստանը մեզ միշտ օգնության է գալիս»: Պուտինը իր հերթին նշեց, որ Ռուսաստանը միշտ արձագանքել է թուրք բարեկամների խնդրանքներին եւ, մասնավորապես, անցած տարի ավելացրել է գազի մատակարարման ծավալները օրական 28 միլիոն խորանարդ մետրից մինչեւ 49 միլիոնը: Կողմերը պայմանավորվեցին երկարաձգել գազի մատակարարման պայմանագիրը, որի գործողության ժամկետն ավարտվում է 2011 թվականին: Պայմանավորվածություն է ձեռք բերվել նաեւ Ռուսաստանի օգնությամբ Թուրքիայում նոր ատոմակայան կառուցելու մասին: Թուրքիայի վարչապետը առաջարկեց նաեւ մասնակցել Սոչիում օլիմպիական օբյեկտների շինարարությանը: «Թուրքական շինարարական ընկերությունները աշխարհում երրորդ տեղն են գրավում շինարարական ծառայությունների շուկայում»,- հիշեցրել է Էրդողանը: Սակայն պաշտոնապես Սոչիում շինարարության հայտ որեւէ թուրքական ընկերություն դեռեւս չի ներկայացրել: