Սենտ-Լյուիսում ընթացող շախմատի Ամերիկայի տղամարդկանց անհատական առաջնության մասնակիցները երեկ հանգստանում էին: Իսկ նախորդ օրը կայացած 7-րդ տուրում սեւ խաղաքարերով հանդես եկող երկու հայ գրոսմայստերներն անհաջողության մատնվեցին:
Վարուժան Հակոբյանը պարտվեց Հակիրա Նակամուրային, իսկ Մելիքսեթ Խաչիյանը՝ Իլդար Իբրահիմովին: Միավորի կորուստը հատկապես նկատելի էր մինչ այդ մրցաշարային աղյուսակը գլխավորող Վարուժանի համար, որը դրանից հետո նույն 4,5 միավորով նահանջեց հինգերորդ հորիզոնական: Ճիշտ է, նա Գատա Կամսկուն, Հակիրա Նակամուրային, Ալեքսանդր Օնիշչուկին եւ Ռոբերտ Հեսսին զիջում է ընդամենը կես միավոր:
Իսկ ահա Խաչիյանը ոչ մի կերպ չի կարողանում հաղթահարել իր վաստակած 2,5 միավորի սահմանը, որի պատճառով էլ ամեն մի հերթական տուրից հետո նահանջում է: Այժմ Մելիքսեթն ընթանում է 21-րդ հորիզոնականում:
