Ադիբեկյանին չեն հավատում

Երեկ հրավիրած ասուլիսում առաջիկա ընտրություններում Ժողովրդական կուսակցության համամասնական ցուցակը գլխավորող Տիգրան Կարապետյանը հրապարակեց «Երաշխիքներ երեւանցիներին» կարգախոսը, որով իրենք առաջնորդվում են այս ընտրություններում, եւ որն, ըստ նրա, շատ արդիական է: Նա նաեւ կարգախոսին համահունչ խոստումներ տվեց երեւանցիներին՝ ընտրվելու դեպքում լուծել նպաստների հարցը, քաղաքային տրանսպորտը դարձնել 50 դրամ, Երեւանի համար սեփական հեռուստաընկերություն հիմնել: Կարապետիչը վստահություն հայտնեց նաեւ, որ իր կուսակցությունը կհավաքի 10 տոկոսից ավելի ձայն: Լրագրողների խնդրանքով համադրելով իր վստահությունը եւ սոցիոլոգ Ահարոն Ադիբեկյանի հրապարակած տվյալները՝ Կարապետիչը կոչ արեց չհավատալ դրանց: Նա խորհուրդ տվեց սոցիոլոգներին հարցում անցկացնել, թե ինչքանո՞վ են իրենց վստահում մարդիկ: Ըստ Կարապետյանի՝ «զրո»: Բանախոսի համոզմամբ՝ հիմնական պայքարը լինելու է ՀԱԿ-ի եւ ՀՀԿ-ի միջեւ, սակայն վերջինս գործի կդնի իր բոլոր լծակերը: Մինչդեռ ինքը՝ Տիգրան Կարապետյանը, իր կարծիքով՝ մրցակից չունի: Քանի որ մրցակցությունը լինում է մի դաշտում, իսկ ինքը մի դաշտում է, մյուս թեկնածուները՝ ուրիշ: Նրա համոզմամբ, ինքն ունի ազնիվ ընտրող, ով համակրում է իրեն: Ի դեպ, նա հայտարարեց նաեւ, որ իր փողերը բերել է Հայաստան ու 10 տարում ծախսել է մոտ 10 մլն դոլար: Այսինքն՝ «Ես կիսվում եմ իմ ժողովրդի հետ եւ երբեք չեմ փոխում իմ դիրքորոշումը»: Ընտրամարաթոնի մեկ այլ մասնակից էլ՝ ՀԱՍԿ-ի համամասնական ցուցակը գլխավորող Մովսես Շահվերդյանը, երեկ հայտարարել է, որ իրենք հիմնականում բակային հանդիպումներ են կազմակերպում, իսկ քարոզարշավի վերջին օրերին ավելի են ակտիվացնելու հանդիպումները ժողովրդի հետ: Իրենց առավելությունը մյուս կուսակցությունների նկատմամբ նա համարում է այն, որ իրենք ներկայացնում են աշխատավորների շահերը: Նա երեւանցիներին խորհուրդ է տվել՝ չհավատալ որեւէ թեկնածուի խոստումներին: Իր մեկնաբանությամբ՝ իր կուսակցությունը խոստումներ չի տալիս, այլ տալիս է գաղափարական ընտրության հնարավորություն: Շահվերդյանը վստահ է, որ ՀԱԿ-ը, ՀՀԿ-ն, ԲՀԿ-ն եւ ՀԱՍԿ-ը կանցնեն 7 տոկոսի շեմը: