Երեկ «Փախստականները եւ միջազգային իրավունքը» քաղաքացիական հասարակության ցանցը հայտարարություն է տարածել, որում մասնավորաբար ասված է. «Անցյալ շաբաթ ԵԽԽՎ միգրացիայի, փախստականների եւ ազգաբնակչության հարցերով հանձնաժողովի զեկուցող Ջոն Գրինվեյի Հայաստան կատարած այցելությունը առիթ տվեց ՀՀ բարձրագույն պաշտոնատար անձանց վերահաստատելու ՀՀ իշխանությունների կողմից բազմիցս արտահայտած այն տեսակետը, որի համաձայն՝ Հայաստանում հիմնականում լուծված է ադրբեջանահայ փախստականների՝ երկրի հասարակությանը ինտեգրվելու հարցը, իսկ ներկայումս նրանց ունեցած միակ հիմնախնդիրը բնակարաններով ապահովված չլինելն է: Միաժամանակ, ՀՀ արտգործնախարարության պաշտոնատարը հերքեց փախստականների հիմնախնդրի կարեւորությունը Ադրբեջան-Արցախ հակամարտության խաղաղ կարգավորմանն ուղղված ջանքերի համատեքստում: Ավելին, ՀՀ բարձրագույն իշխանությունը փախստականների հարցի արծարծումը որակում է որպես նրանց հիմնախնդիրների շահարկում կամ քաղաքականացում: Հիշեցնում ենք Հայաստանի իշխանություններին, որ ավելի քան կես միլիոն ադրբեջանահայ փախստականների ոտնահարված իրավունքների ու շահերի մասին խոսելը ոչ թե քաղաքական շանտաժ է, այլ ՀՀ եւ ԼՂՀ իշխանությունների պարտքն է ու պարտականությունը:
Կարեւոր է վերջապես հասկանալ, որ ԼՂ հիմնախնդիրը հայկական կողմերի համար այլեւս չի կարող սահմանափակվել լոկ ԼՂՀ ժողովրդի ինքնորոշման իրավունքի միջազգային ճանաչմամբ: 1988թ. ի վեր շատ բան է փոխվել: ՀՀ եւ ԼՂՀ իշխանությունները պարտավոր են մշակել ու վարել այն արտաքին քաղաքականությունը, որը կներառի մեր ժողովրդի բոլոր հատվածների շահերն ու իղձերը, մինչդեռ այսօր Հայաստանի իշխանությունները իրար են հակադրում ադրբեջանահայ փախստականների ու արցախահայության շահերը: Համազգային շահերի հատվածական ընկալումը անխուսափելիորեն հանգեցնելու է աղետալի հետեւանքների»:
