«Արդեն հոգնել ենք տարաբնույթ հայտարարություններից: Բրայզան ռուսերեն շատ լավ է խոսում, բայց խոսում է առանց հասկանալու, թե ինչ է ասում: Ինքն ասել է, որ այսօր մեծ քայլ է, որ Ալիեւը խոսում է ինքնավարության մասին, ինչը նորույթ է»,- նկատի ունենալով վերջերս ԵԱՀԿ Մինսկի խմբի համանախագահ Մեթյու Բրայզայի հայտարարությունը, երեկ «Հայելի» ակումբում հայտարարեց քաղաքագետ Սուրեն Զոլյանը: Ըստ բանախոսի, ինքնավարության մասին խոսելը նորույթ չէ եւ Մ. Բրայզան հավանաբար մոռացել է, որ դեռ Հեյդար Ալիեւը խոստանում էր Ղարաբաղի ժողովրդին ամենամեծ կամ ամենաբարձր աստիճանի ինքնավարություն՝ Ադրբեջանի կազմում: «Վիճակը մտահոգիչ է, որովհետեւ, արված հայտարարություններից ու ընդունված փաստաթղթերից հասկանում ենք, որ նոր փուլ է սկսվել, որին այնքան էլ պատրաստ չենք»,- ասաց պարոն Զոլյանը: Բանախոսի կարծիքով՝ Ադրբեջանը փորձում է հարցի քննարկումը տեղափոխել ՄԱԿ-ի կառույցներ եւ դա նրան հաջողվում է. մեզ փորձում են ինչ-որ բաներ պարտադրել:
Կառավարման փորձագետ Հարություն Մեսրոբյանն էլ հեռու է այն մտքից, թե Բրայզան սխալվում է կամ սխալ արտահայտվելը նրա՝ ռուսերենի վատ իմացության դրսեւորում է: Ըստ փորձագետի, Բրայզայի «առաքելությունը» հետեւյալն է՝ պարբերաբար «սարքել», այսպես կոչված, պրովոկացիոն-ինֆորմացիոն արտահոսք, որը երկու նպատակ է հետապնդում: Առաջինը՝ ուղղակի նայել, թե ինչ արձագանքներ են լինելու, կողմերը ինչ դիրքորոշում են ձեւավորելու այս կամ այն հարցի վերաբերյալ: «Քաղաքականության մեջ սա շատ տարածված է, երբ նախապատրաստվում են ինչ-որ ուղղություն բռնել՝ սկսում են «մեսիջ» ուղարկել»,- ասում է Մեսրոբյանը:
Ս. Զոլյանն էլ շարունակում է. «Այն, ինչ հայտարարում է Բրայզան, բոլորովին դուրս է միջնորդի լիազորություններից… Իսկ հարցերը, որոնք առաջարկում է որպես օրակարգում քննարկման հարցեր, գաղափարախոսական կամ ինֆորմացիոն դիվերսիա են…»,- ասաց Ս. Զոլյանը: Վերջինիս կարծիքով՝ այսօր ամենալուրջ խնդիրն այն է, որ նորից հիշեցնենք ինքնորոշման իրավունքի գերակայության մասին, իսկ աշխարհում լուրջ փոփոխություններ են սպասվում, եւ կան հնարավորություններ որոշակի առավելությունների հասնելու համար, որն ակնհայտ դարձավ Օբամայի ընտրվելուց հետո: Հ. Մեսրոբյանը համաձայնեց Զոլյանի այն կարծիքի հետ, թե վտանգավոր պրոցեսներ են գնում եւ խորհուրդ տվեց ԶԼՄ-ներին. «Գերմանական ճշտությամբ հետեւել բառերին. կան նուրբ երանգներ եւ եթե պետք է, ուրեմն՝ տերմինաբանական բառարաններից բացահայտեք բառերի իմաստը, որպեսզի մարդիկ հանկարծ չսխալվեն ուղղակի լսելով այս կամ այն բառը»:
Փորձագետը նաեւ ավելացրեց. «Այսօր մենք դժբախտաբար ունենք միայն վիրտուալ առավելություններ, որովհետեւ Հայաստանը շատ վատ է օգտագործում իր հնարավորությունները: Ես վախենում եմ, որ Գ. Նժդեհի այն խոսքերը, թե Հայաստանը վարում է քաղաքական մուրացկանի քաղաքականություն, տեղափոխվել են նաեւ մեր օրերը…»:
