Ղարաբաղյան բանակցություններում Ռուսաստանի նախկին ներկայացուցիչ Վլադիմիր Կազիմիրովը «Վրեմյա նովոստեյ» թերթում հանդես է եկել ծավալուն հրապարակմամբ, որը նվիրված է հակամարտության գոտում զինադադարի 15-ամյակին: Ըստ դիվանագետի՝ ղարաբաղյան կարգավորման արդիականությունը մեծացել է Սահակաշվիլու օգոստոսյան արկածախնդրության ֆոնի վրա: Չնայած այս հարցում կա որոշակի առաջընթաց, որոշակի դժվարություններ առայժմ չեն հաղթահարվել: Ադրբեջանցիների եւ հայերի շրջանում, Կազիմիրովի կարծիքով, չի նկատվում փոխզիջումների պատրաստակամությունը, իսկ առաջնորդները չեն պատրաստում մարդկանց զիջումների: Որոշ հարցերով կողմերի դիրքորոշումներն անհամատեղելի են: Առայժմ «խաղից դուրս է» ինքը՝ Լեռնային Ղարաբաղը: Հայաստանի համար կարեւոր է վերջինիս կարգավիճակը, ադրբեջանցիների համար՝ կորցրած հողերի վերադարձը, իսկ այդ կորուստը, դիվանագետի ասելով, տեղի է ունեցել հենց այն պատճառով, որ ժամանակին Ադրբեջանը համառորեն ցանկանում էր հարցը լուծել ռազմական ճանապարհով: Կազիմիրովը պնդում է, որ ԵԱՀԿ-ի համար պետք է առաջնահերթություն լինի կողմերի միջեւ իրավական փաստաթղթի՝ համաձայնագրի կնքումը, որում նրանք կպարտավորվեին հրաժարվել խնդրի լուծման նպատակով ուժի գործադրումից:
